काठमाडौँ, १५ चैत - ३१ वैशाखमा हुने स्थानिय तहको निर्वाचन नजिकिँदै गर्दा चुनावी माहोल तात्न थालेको छ । सरकार, निर्वाचन आयोगदेखि अन्य सबै सरोकारवाला निकायहरू निर्वाचनको तयारीमा जुटेका छन् । सहर–बजार, गाउँघर, चिया–चौतारामा समेत निर्वाचनको चर्चा हुन थालेको छ । १९ वर्षपछि हुन लागेको स्थानीय निर्वाचनमा आफ्नो अवस्था सुदृढ बनाउन राजनीतिक दलहरू तयारीमा जुटेका छन् । निर्वाचन लक्षित घोषणापत्र, प्रतिबद्धता पत्र बनाउनेदेखि उम्मेदवार चयनको मापदण्ड तय गर्ने र उम्मेदवार चयन गर्ने गृहकार्यमा दलहरू जुटेका छन्, नयाँ पत्रिकामा खबर छ ।
संघीय लोकतान्त्रिक नेपालको संविधान जारी भएपछि पहिलोपटक हुनलागेको निर्वाचनबाट ४ महानगरपालिका, १३ उपमहानगरपालिका, २४६ नगरपालिका र ४८१ गाउँपालिकामा जनप्रतिनिधि चयन हुनेछन् । त्यसैले निर्वाचनको रौनक राजधानीदेखि विकट गाउँघरसम्मै चढेको छ ।
देशको राजधानी काठमाडौं र उपत्यकाभित्रकै ललितपुर महानगरपालिकाको मेयर–उपमेयर को बन्लान् भन्ने चौतर्फी चासो देखिन्छ । अझ विशेष त काठमाडौंको मेयर को बन्लान् भन्ने कौतुहलता छ ।
काठमाडौं महानगरपालिकामा कांग्रेसका तर्फबाट मेयरका लागि तीनजनाले आकांक्षा देखाएका छन् । नरोत्तम वैद्य, प्रगति रञ्जित, राजुराज जोशीले मेयरका लागि आकांक्षा देखाएका हुन् । उनीहरूले टिकट हात पार्न लबिङ गरिरहेका छन् । तीनजनामध्ये जोशी उद्योगमन्त्री नवीन्द्रराज जोशीका दाजु हुन् । उनी पौडेलपक्षीय मानिन्छन् । वैद्य र रञ्जित संस्थापन पक्षका हुन् ।
नेता कृष्ण सिटौला पक्षले स्वास्थ्यमन्त्री गगन थापालाई उम्मेदवार बनाउन चाहे पनि उनले आफ्नो कुनै आकांक्षा नरहेको बताएका छन् ।
थापा काठमाडौं क्षेत्र नं ४ का प्रत्यक्ष निर्वाचित सांसद हुन् । केन्द्रबाट उम्मेदवारसम्बन्धी मापदण्ड आइनपुगेकाले मेयरको टिकट कसलाई दिने भन्नेबारे जिल्ला समितिमा छलफल नभएको काठमाडौंका पूर्वसभापति तथा सांसद ध्यानगोविन्द रञ्जितले बताए ।
