काठमाडौं, १५ चैत — भारतको आगामी राष्ट्रपतिका लागि शिवसेना पार्टीले राष्ट्रिय स्वयंसेवक संघ (आरएसएस) का प्रमुख मोहन भागवतको नाम अघि सारेको छ ।


पार्टीका सांसद सञ्जय राउतले भारतलाई हिन्दूराष्ट्र बनाउनका लागि भागवतलाई राष्ट्रपति बनाउनु राम्रो हुने बताए ।
बहालवाला राष्ट्रपति प्रणव मुखर्जीको कार्यकाल यही जुलाई महिनामा सकिँदैछ ।

राउतले भने, ‘यो देशको सबभन्दा ठूलो पद हो । यसमा स्वच्छ छवि भएको व्यक्ति मात्र बस्न सक्छ । त्यसैले भागवतलाई राष्ट्रपति बनाउने विषयमा चर्चा चलेको हामीले सुनेका छौं ।’

प्रधानमन्त्री नरेन्द्र मोदीले गुडी पडवा पर्वको अवसरमा शिवसेना प्रमुख उद्धव ठाकरेसमेत एनडीएका सहयोगी पार्टीहरूलाई डिनरमा बोलाएका छन् ।

यही अवसरमा राष्ट्रपति चुनावको रणनीति पनि तयार पारिने बताइएको छ ।

सञ्चारमाध्यमहरूमा आएअनुसार भाजपाका एक वरिष्ठ नेताले लालकृष्ण आडवाणी, सुमित्रा महाजन, सुष्मा स्वराज र झारखण्डकी गभर्नर द्रौपदी मुरमुको नाममा सहमति बन्ने सम्भावना छ ।

दैनिक भास्करबाट