काठमाडौं, १५ चैत– राष्ट्रिय प्रजातन्त्र पार्टी (राप्रपा) परित्याग गरेका पूर्व राष्ट्रिय अध्यक्ष डा. प्रकाशचन्द्र लोहनीले बुधबार नयाँ पार्टी घोषणा गर्ने भएका छन् । राप्रपा नेपालबाट पहिल्लै अलग्गिएका केशरबहादुर विष्टलाई साथमा लिएर लोहनीले नयाँ पार्टी घोषणा गर्न लागेका हुन् ।
लोहोनीले घोषणा गर्न लागेको नयाँ पार्टीको नाम एकीकृत राष्ट्रिय प्रजातन्त्र पार्टी राष्ट्रवादी राखिने जनाइएको छ । पार्टीको चुनाव चिन्ह हलो राख्ने तयारी भएको लोहनीका सहयोगीहरुले जानकारी दिए ।
७१ जनाको केन्द्रीय समिति बनाउने गरी लोहनीले राप्रपाका पुराना नेताहरुसँगको छलफललाई तीब्र बनाएका छन् । पार्टी एकताको समयमा भएको सहमति विपरित पार्टीको चुनाव चिन्ह हलो हटाइएको तथा राप्रपा अध्यक्ष एवं उपप्रधानमन्त्री कमल थापाको एकाधिकार चलेको भन्दै लोहनी राप्रपाबाट अलग्गिका थिए ।
बुधवार सुकेधाराको एसआर क्याटरिङबाट पार्टी घोषणा हुने नेताहरुले जनाएका छन् । पार्टीमा गणेश शेरचनको राप्रपा समानान्तर, केशर बहादुर विष्टको एकीकृत राष्ट्रवादी शक्ति निर्माण अभियान र लोहनीको सहभागिता हुने छ । त्यसअघि बुधवार नै निर्वाचन आयोगमा पार्टी दर्ताका लागि निवेदन दिने तयारी छ ।
