२१ असार २०८३, आइतबार
काठमाडौं – चीनको शेनझेनस्थित लोङगाङ केन्द्रीय अस्पतालमा कार्यरत चिकित्सक दाइ युले बीचमा आराम नगरिकन लगातार सातवटा शल्यक्रिया गरेका छन् ।
अपरेसनहरू सकेपछि उनी थाकेर भुइँमा सुतेको तस्वीर सार्वजनिक भएको छ । इन्टरनेटमा उनलाई नायक भनी प्रशंसा गरिएको छ ।
डा दाइ उक्त अस्पतालमा अर्थोपेडिक विभागका उपनिर्देशक हुन् ।
उनी सुतेको तस्वीर उनका एक सहकर्मीले खिचेका हुन् ।
दाइले स्थानीय टीभी स्टेसन लोङगाङ च्यानललाई बताएअनुसार, उनी र उनका सहकर्मीहरूले त्यस दिन १० वटा अपरेसन गर्नुपर्ने थियो ।
बिहान ८ बजेदेखि काम थालेका उनले ब्रेक नलिइकन सातवटा शल्यक्रिया गरेका छन् ।
बेलुका ५ बजेतिर डा दाइले शल्यक्रिया कक्षको भुइँमा १० मिनट बस्ने निर्णय गरे । त्यसबीचमा उनका सहकर्मीहरूले अर्को शल्यक्रियाको तयारी गरिरहेका थिए ।
सुस्ताउने क्रममा उनी निदाएछन् अनि उनका एक सहकर्मीले उनको तस्वीर खिचेर सामाजिक सञ्जालमा राखेका थिए ।
निद्राबाट उठेपछि उनले शल्यक्रिया जारी राखे अनि राति ९ बजेसम्म शल्यक्रिया कक्षमा बसे ।
उनको यो मेहनतको खुबै प्रशंसा भइरहेको छ ।
एजेन्सी
