सोलुखुम्बु –जिल्लाको नेचासल्यान गाउँपालिका–२ सल्यान कुमाल गाउँको एक घरमा आगलागी भएको छ ।

लक्ष्मीपूजाका लागि बालिएको दियोबाट आगो सल्ँिकदा स्थानीय रुपा नेवारको ६ लाख रुपैयाँ बराबरको क्षति भएको प्रहरी नायब उपरीक्षक नारायणप्रसाद चिमोरियाले जानकारी दिए ।

आगलागीबाट लक्ष्मीपूजाका लागि राखिएको नगद १ लाख ५० हजार रुपैयाँ, ५ तोला सुन, १० तोला चाँदी, ५ माना सिक्का पैसासहित कोठाभित्र रहेको सम्पूर्ण सामग्री जलेर नष्ट भएका प्रहरीले जनाएको छ । 

प्रहरीका अनुसार पूजाकोठाबाट शुरू भएको आगोले नेवारको ढुंगा माटोले बनेको ३ तलेघरको पूजाकोठा जलेर नष्ट भएको छ । साँझ ७ः४५ बजेबाट शुरू भएको आगो राति साढे ९ बजे स्थानीय र प्रहरीको सक्रियतामा नियन्त्रणमा आएको थियो । तत्काल थाहा भएर आगो नियन्त्रणमा लिन सफल भएकाले ठूलो क्षति हुनबाट जोगिएको स्थानीयले बताएका छन् । रुपा नेवार नेचासल्यान गाउँपालिका–२ का वडा सदस्यसमेत हुन् ।

१ हप्तामा करोड बढी क्षति

पछिल्लो १ हप्तामा नै जिल्लाको ३ ठाउँमा आगलागी भएको छ । कात्तिक ३ गते मात्रै सोही गाउँपालिका–१ का चन्द्रप्रकाश कोइरालाको तीनतले घरमा आगलागी भएको थियो । प्रहरीको मूल्यांकन अनुसार कोइरालाको ९८ लाख रुपैयाँ बराबरको क्षति भएको थियो । 

कात्तिक ७ गते सोलुदूधकुण्ड नगरपालिका–११ को गन्जेडाँडाका खड्गबहादुर खड्काको घरमा आगलागी भएको थियो । प्रहरीका अनुसार सल्यानमा खड्काको घर पूर्णरूपले जलेर नष्ट हुँदा ८५ लाख रुपैयाँ बराबरको क्षति भएको छ ।