०३ असार २०८३, बुधबार
नेपालगञ्ज – वर्षभरिको आयस्रोतका रुपमा रहेको धानबालीलाई फौजी किराले सखाप पारेपछि बाँके र बर्दियाका हजारौं किसान परिवारको विचल्ची भएको छ ।
‘हाम्रो त वर्षभरिको कमाई नै धान हो, त्यो पनि सखाप भएपछि बिहान बेलुका हातमुख जोर्न धौधौ भएको छ,’ बाँके डुडुवा गाउँपालिका–६ का किसान रेखाउल्ला खाँले पीडा पोखे ।
अन्नको भण्डार भनेर चिनिने बाँके बर्दियाको धानबालीलाई फौजी किराले नोक्सान पुर्याएपछि पीडित किसानले तिनै तहको सरकारसँग सहयोगको गुहार लगाएका छन् ।
बाँके र बर्दियाका स्थानीय सरकार, प्रदेश सरकार र संघीय सरकारसँग क्षतिपूर्तिको माग किसानले राखेका छन् ।
केही दिनअघि नेपालगञ्ज आएका प्रदेश ५ सरकारका मुख्यमन्त्री शंकर पोखरेल र संघीय सरकारका शहरी विकासमन्त्री मोहम्मद इस्तियाक राईसमक्ष पीडित किसानले ज्ञापनपत्र बुझाएर सहयोगको याचना गरेका थिए ।
कृषि ज्ञान केन्द्र बाँकेका प्रमुख सागर ढकालले, फौजी किराले बाँकेमा १७ हजार र बर्दिया २ हजार हेक्टर धानबालीलाई क्षति पुर्याएको बताए । उनका अनुसार ५ हजार घरधुरीको विचल्ली भएको छ ।
