काठमाडौं, २९ चैत– नेपाल उद्योग वाणिज्य महासंघको वरिष्ठ उपाध्यक्षमा शेखर गोल्छा विजयी भएका छन् । वरिष्ठ उपाध्यक्षका अर्का प्रत्यासी किशोर प्रधानलाई पराजित गर्दै उनी वरिष्ठ उपाध्यक्षमा विजयी भएका हुन् ।
मंगलबार अबेर सम्पन्न मतपरिणामअनुसार जिल्लातर्फ गोल्छाले ६१ मत प्राप्त गरे भने प्रधानले ४२ मत ल्याए। यस्तै वस्तुगतमा प्रधानले ५१ मत पाए भने गोल्छाले ४७ मत ल्याए ।
गोल्छा वरिष्ठ उपाध्यक्षमा विजयी बनेसँगै उनी अर्को कार्यकालका लागि अध्यक्ष बन्ने बाटो खुला भएको छ ।
महासंघको संशोधित विधानअनुसार वरिष्ठ उपाध्यक्षमा निर्वाचित हुनेले अर्को कार्यकालमा स्वतः अध्यक्ष हुन पाउने व्यवस्था छ | सोहि अनुसार यो कार्यकाल भने भवानी राणा महासंघको अध्यक्ष बन्नेछिन् ।
जिल्ला तथा नगरको उपाध्यक्षमा प्रधान समूहका प्रमोद श्रेष्ठ जियी भए भने वस्तुगततर्फको उपाध्यक्षमा उमेशलाल श्रेष्ठ विजयी भए | यस्तै एशोसियटतर्फबाट चन्द्रप्रसाद ढकाल सर्वसम्मत उपाध्यक्ष चयन भए ।
नेतृत्व चयनका लागि महासंघमा आज दिनभर मतदान भएको थियो ।
