काठमाडौं, ३० चैत– ‘हिँउचितुवा’ नामले चिनिने कीर्तिमानी पर्वतारोही आङरिता शेर्पाको स्वास्थ्यस्थितिबारे जानकारी लिन संस्कृति, पर्यटन तथा नागरिक उड्डयनमन्त्री दिलनाथ गिरी बुधबार काठमाडौंको बाँसवारीस्थित न्युरो अस्पताल पुगेका छन् ।
बिनाअक्सिजन १० पटक सगरमाथा चढेका शेर्पा टाउको, कलेजोमा समस्या देखिएपछि एक हप्तादेखि न्युरो अस्पतालमा उपचार गराइरहेका छन् ।
स्वास्थ्यस्थितिबारे जानकारी लिँदै मन्त्री गिरीले स्वास्थ्य उपचारका लागि राज्यले गर्नुपर्ने सहयोग गर्न तयार रहेको पनि बताए ।
मन्त्री गिरीले बिनाअक्सिजन १० पटक सगरमाथा आरोहण गरेर मुलुकको इज्जतलाई उचाइमा पु¥याएको भन्दै शेर्पाको उपचारका लागि मन्त्रिपरिषद्मा समेत कुरा लैजाने जानकारी दिए ।
सो भेटमा मन्त्रालयका सचिव शङ्करप्रसाद अधिकारी तथा नेपाल पर्यटन बोर्डका कार्यकारी निर्देशक दीपकराज जोशीको पनि उपस्थिति रहेको थियो ।
