०९ साउन २०८३, शनिबार
उत्तर कोरियामा एक महिलाले घरमा आगो लागेपछि आफ्ना दुई सन्तानलाई जोगाउने क्रममा शासकहरूको तस्वीर जल्नका लागि छोडेको पाइएपछि कारावास पठाइने धम्की पाएकी छन् ।
ती महिलालाई देशको गृह मन्त्रालयले अनुसन्धानमा राखेको छ । चीनसँगको सीमामा रहेको ओनसोङ काउन्टीमा दुई परिवार बस्ने एक घरमा आगो लागेपछि घटना भएको थियो ।
आगो लाग्दा दुवै परिवारका मातापिता बाहिर थिए । धूँवा देखेपछि उनीहरू घरतिर दौडिँदै आए । त्यसक्रममा एक चित्र जलेर नष्ट भयो ।
उत्तर कोरियाका सबै घरमा किम इल–सुङ र किम जोङ–इलको तस्वीर अनिवार्य झुण्ड्याउनुपर्छ । निरीक्षकहरूले बेला बेलामा तस्वीर छ कि छैन भनी निरीक्षण गर्ने गरेका छन् ।
त्यहाँको कानून अनुसार किम परिवारका सबै चित्रलाई मानिसलाई जत्तिकै सम्मान दर्शाउनुपर्छ । त्यसैले चित्रलाई उचित सम्मान नदिनु गम्भीर अपराध मानिन्छ ।
दोषी साबित भएमा ती आमाले लामो कारावास र कठोर श्रमको सजाय पाउनेछिन् ।
अनुसन्धानको दायरामा परेकाले उनले अस्पतालमा आफ्ना छोराछोरीको हेरचाह गर्न पाएकी छैनन् अनि उनीहरूको घाउमा एन्टीबायोटिक लगाउन समेत पाएकी छैनन् ।
उनका छिमेकीहरूले सहायता गर्नका लागि इच्छा देखाएको भए पनि उनलाई राजनीतिक अपराधको आरोप लगाइने डरले टाढै बस्ने निर्णय लिए ।
एजेन्सी
