१३ असार २०८३, शनिबार
अमेरिकाको लस एन्जलस विमानस्थलबाट चीनको शांघाई शहरका लागि उडेको विमानमा अचानक प्राविधक गडबडी आयो ।
थाहा पाउनेबित्तिकै विमानलाई आकस्मिक अवतरण गर्न भनियो । आकस्मिक अवतरण प्रक्रियामा विमानले आफ्नो इन्धन घटाउने गर्छन् । यस विमानले इन्धन झार्ने क्रममा एक विद्यालयमा झार्न पुग्यो । त्यसले गर्दा ६० जना घाइते भए ।
लस एन्जलस काउन्टी दमकल विभागका निरीक्षक सीन फर्ग्युसनले जेट फ्युलका कारण कुडाहीमा रहेको पार्क एभेन्यु इलेमेन्टरी स्कूलका २० बालबालिका र ११ वयस्कलाई हलुका चोटपटक लागेको छ ।
उक्त स्कूल एयरपोर्टभन्दा ३१ किलोमिटर टाढा छ । इन्धन झरेपछि बालबालिकाले पोल्यो पोल्यो भने । तत्कालै आपतकालीन सेवालाई त्यता पठाइयो । अनि धेरैजसो बालबालिकालाई प्राथमिक उपचारपछि छुट्टी दिइयो ।
त्यसबाहेक पनि स्यान गेब्रियल इलेमेन्टरी, ग्राहम इलेमेन्टरी, ट्वीड इलेमेन्टरी लगायतका स्कूलमा पनि इन्धन खस्यो । जेट फ्युल परेका केही मानिसलाई साबुन पानीले धोइयो । तर कसैलाई पनि अस्पताल लग्नुपरेन ।
दमकल विभागका निरीक्षक स्काई कोर्नेलले बालबालिकालाई कपडा बदल्न गाउन दिइएको बताए ।
डेल्टा एयरलाइन्सले विमान ८९ बाट फ्युल खसाइएको जनायो । प्राविधिक गडबडी आएपछि विमानलाई तत्कालै लस एन्जेलस विमानस्थल फर्काइयो ।
विमानमा २८८ यात्री थिए । त्यसलाई सुरक्षित अवतरण गराइयो ।
फेडरल एभिएसन एडमिनिस्ट्रेसनले घटनाको अनुसन्धान थालेको छ । नियममुताबिक कुनै पनि विमानको आकस्मिक अवतरण गराउँदा मानिसको बस्तीमाथि जेट फ्युल खसाउन पाइँदैन ।
फ्युल डम्प गर्ने विषयमा अमेरिकामा निकै कडा कानून छ । आपतकालीन अवस्थामा विमानको इन्धन फाल्दा १० हजार फीटमाथिबाट खसाउनुपर्ने र पानीमा खसाउनुपर्ने नियम छ ।
तर डेल्टाका पाइलटलाई यी दुवै विकल्प उपलब्ध थिएनन् । उनले केही समय अगाडि मात्र टेकअफ गरेका थिए । पाँच हजार फीटमाथिबाट फ्युल डम्प गरेको भए पनि तल आइपुग्दा नपुग्दै त्यो हावामा विलीन भइसक्थ्यो । यो विमान ५ हजार फीटभन्दा मुनिबाट उडिरहेकाले बालबालिकामाथि इन्धन खसेको हो ।
एजेन्सी
