एनआईसी एशिया बैंकले कोशी प्रदेशमा आयोजना हुन गइरहेको ‘बिराट गोल्ड कप फूटबल प्रतियोगितालाई’ मुख्य प्रायोजन गर्ने गरी आयोजक विराट गोल्ड कप फूटबल ट्रष्टसँग सम्झौता गरेको छ । सो सम्झौतापत्रमा बैंकका तर्फबाट ब्रान्डिङ एण्ड कर्पोरेट कम्युनिकेसन प्रमुख सरोज भट्टराई र आयोजकका तर्फबाट ट्रष्टका अध्यक्ष किशोरबहादुर शाहीले हस्ताक्षर गरे ।

चैत्र १५ (बिहीवार)देखि २४ गतेसम्म विराटनगरस्थित शहीद रंगशाला सञ्चालन हुन गइरहेको उक्त प्रतियोगितामा १० टोली सहभागी हुँदैछन् । जसमा संकटा क्लब, सशस्त्र प्रहरी बलको एपीएफ क्लब, मोरङ–११, त्रिभुवन आर्मी क्लब र चर्च बोइज युनाइटेड सहभागी हुनेछन् ।

यस्तै मच्छिन्द्र फूटबल क्लब, थ्रीस्टार क्लब, नेपाल पुलिस क्लब, सुनसरी–११, भुटानबाट भुटान एफसी, भारतबाट दिल्ली एफसी, माने भञ्ज्याङ दार्जिलिङ, कोलकत्ता–११ र पञ्जाब पुलिस टीम पनि सहभागी हुनेछन् । 

कोशी प्रदेशमा रहेका नयाँ खेलाडीहरूलाई हौसला प्रदान गर्ने हेतुले आयोजना हुन गइरहेको यस प्रतियोगिताका विजेताले नगद ११ लाख, उपविजेताले ५ लाख ५० हजार रुपैयाँलगायत ट्रफी, मेडल र प्रमाणपत्र प्राप्त गर्नेछन् ।

साथै, सर्वोत्कृष्ट खेलाडीलाई मोटरसाइकल, सर्वाधिक गोलकर्ता, उत्कृष्ट प्रशिक्षक तथा उत्कृष्ट गोलरक्षक र उत्कृष्ट खेलाडीलाई जनही २१–२१ हजार रुपैयाँ प्रदान गरिनेछ ।

नेपाली जनमानसको मन–मनमा विशेष स्थान ओगटेको फूटबल खेललाई थप उचाइमा पुर्याउन यो सहकार्यले विशेष योगदान पुग्ने विश्वास लिएको बैंकले जनाएको छ ।

‘यस बैंकले एकता, टीमवर्क र उत्कृष्टताको भावनालाई बढावा दिँदै आएको अवस्थामा खेल जीवनमा समेत सो कुरा चरितार्थ हुँदै आएको छ,’ बैंकले जारी गरेको विज्ञप्तिमा भनिएको छ, ‘बैंकले यस्ता प्रतियोगिताहरूमा सहकार्य गरेर खेल जीवनलाई प्रवर्द्धन गर्ने मात्र नभई राष्ट्रियस्तरमा आफ्नो प्रतिभा प्रदर्शन गर्न लालायित युवा खेलाडीलाई उत्कृष्ट मञ्च प्रदान गर्ने लक्ष्य राखेको छ । बैंक पनि साथी पनि, राम्रो पनि हाम्रो पनि भन्ने बैंकको नारालाई चरितार्थ गर्नसमेत खेल क्षेत्रसँगको सहकार्यले ठोस टेवा दिने समेत बैंकको विश्वास रहेको छ ।’

एनआईसी एशिया बैंक मुलुकमा सबैभन्दा धेरै बैंकिङ्ग सञ्जालहरू भएको बैंकहरू मध्येको एक हो । यस बैंकले मुलुकभर ३६० शाखा कार्यालय, ६७० एटीएम, ११६ वटा विस्तारित काउन्टर एवं ५१ वटा शाखासहित शाखा सञ्जाल विस्तार गरेको छ ।