राष्ट्रिय प्रजातन्त्र पार्टीका अध्यक्ष कमल थापाले  अमेरिकी सरकारको सहायता मिलेनियम च्यालेन्ज कर्पाेरेसन (एमसीसी) नेपालको हितमा रहेको स्पष्ट पारेका छन् । 

राप्रपा ५ नम्बर प्रदेश समितिले मंगलवार बुटवलमा गरेको पत्रकार भेटघाट कार्यक्रममा बोल्दै थापाले एमसीसीप्रति बाहिर आएका आंशकाले जनतामा भ्रम सिर्जना भएकाले त्यसप्रति सरकारको स्पष्ट धारणा आउन आवश्यक रहेको बताए ।  

‘एमसीसी नेपाललाई आवश्यक छ । प्रधानमन्त्रीले संसदबाट पारित हुन्छ पनि भन्नुभएको छ । सरकारपक्षीय नेताहरूले पनि एमसीसीको विरोध गर्नुभएको छ । यस्ता प्रश्न र आशंकाले जनतामा भ्रम सिर्जना भएको छ । एससीसीप्रति बुझाउने गरी सरकारले जनतासँग विचार राख्नुपर्छ,’ थापाले भने ।

अमेरिकी सहयोगबारे कसैले पनि विवाद गर्न आवश्यक नभएको उनले दाबी गरे । उनले दुईतिहाइ बहुमतको केपी ओली नेतृत्वको सरकारले जनताको अपेक्षा अनुसार काम गर्न नसकेको दाबी गरे । 

‘अहिलेको सरकारप्रति जनताले ठूलो आशा थियो तर सरकारले जनतालाई सकारात्मक अनुभूति दिएन,’ उनले भने, ‘प्रधानमन्त्रीले गृहजिल्लामा गएर सरकार ढाल्ने षड्यन्त्र भएको छ भनेर बोल्नुभएको छ । त्यो भनाइले एउटा तरंग ल्याएको छ । कस्तो कहाँबाट षड्यन्त्र भएको हो ? त्यो धारणा प्रधानमन्त्रीले राख्नुपर्छ/खुलाउनुपर्छ ।’

थापाले सरकार ५ वर्ष चल्नुपर्ने बताए । ‘पछिल्लो १० वर्षमा ११ वटा सरकार बन्दा अस्थिरताले जनता वाक्क भएका छन् । देशमा स्थायित्वका लागि पनि अहिलेको सरकार ५ वर्ष चल्नुपर्छ,’ थापाले भने । 

गत चुनावमा कांग्रेससँगको सहकार्यमा इमान्दारिता नहुँदा आफ्नो पार्टीले नराम्रो पराजय भोग्नुपरेको उनले बताए । ‘कांग्रेससँग सहकार्य गर्ने भुल भयो । निर्वाचनमा सहकार्य गरेको कांग्रेस सहकार्यप्रति इमान्दार भएन,’ उनले भने ।

अध्यक्ष थापाले राष्ट्रिय प्रजातन्त्र पार्टी हिन्दूराष्ट्र र राजतन्त्रको विषयमा विगतदेखि नै स्पष्ट रहेको बताउँदै राजा र राजसंस्थालाई विवादमा तान्न नहुने बताए । आउँदो निर्वाचनमा राप्रपा तेस्रो शक्तिका रुपमा आउने दाबी उनले गरे । उनले आउँदो जेठमा हुने पार्टीको महाधिवेशन पनि निर्वाचनलाई लक्षित गरी ९ महिना अगाडि नै गर्न लागिएको जानकारी गराए ।