बेलायतको हीथ्रो विमानस्थलमा एतिहाद एयरवेजको ए३८० विमानलाई डेनिस आँधीका कारण आएका तीव्र हावाले हल्लाएपनि पाइलटले सकुशल अवतरण गराएका छन् । 

घटनामा विमानमा रहेका कसैलाई पनि चोटपटक लागेको छैन । 

बेलायतमा खराब मौसमका कारण धेरै विमानहरू बल्लबल्ल अवतरण गरे भने दुईवटा विमान त अवतरणै गर्न सकेनन् । 

सयौं उडान स्थगित गर्नुपरेको छ र यसले २५ हजार यात्रुलाई असर पारेको छ । 

बेलायतका कैयौं भागमा ९० माइल प्रतिघन्टा बढी तीव्र गतिमा हावा चल्यो अनि कतैकतै ४८ घन्टामै एक महिनामा पर्ने जति पानी पर्‍यो । 

निरन्तर वर्षा भएर चर्को हावा चलेपछि आइतवार सडक र रेलमार्गहरू पानीले भरिएका थिए । 

साउथ वेल्समा अत्यधिक वर्षाले बाढीको जोखिम निम्त्याएपछि मौसम विभागले रेड वार्निङ जारी गरेको छ ।