प्रधानमन्त्री केपी शर्मा ओलीले आगामी बुधवार मिर्गौला प्रत्यारोपण गराउने भएका छन् ।

त्यसका लागि ओली भोलि नै त्रिवि शिक्षण अस्पतालस्थित ट्रान्सप्लान्ट सेन्टरमा भर्ना हुने नेकपा प्रवक्ता नारायणकाजी श्रेष्ठ प्रकाशले जानकारी दिए ।

सत्तरुढ दल नेकपाको अध्यक्ष समेत रहेका ओलीलाई नेकपा सचिवालय बैठकले स्वास्थ्यलाभको कामना समेत गरेको छ ।

'आजको बैठकमा सम्माननीय प्रधानमन्त्री एवं पार्टीका अध्यक्ष केपी शर्मा ओलीले स्वास्थ्य उपचारको योजनाबारे जानकारी गराउनुभयो । यही बुधवार उहाँको मिर्गौला प्रत्यारोपण गर्ने योजना बनाइएको छ, जसअनुसार उहाँ भोलि नै अस्पतालमा भर्ना हुनुहुनेछ । त्रिवि शिक्षण अस्पतालमा मिर्गौला प्रत्यारोपण गरिने छ,' बालुवाटारमा आइतवार बसेको सचिवालय बैठकपछि प्रवक्ता श्रेष्ठले भने, 'बैठकले उहाँको सफल शल्यक्रिया र शीघ्र स्वास्थ्यलाभको कामना गरेको छ ।'

प्रवक्ता श्रेष्ठले प्रधानमन्त्रीको स्वास्थ्यबाहेक अन्य विषयमा बैठकमा छलफल नभएको जिकिर गरे ।