कोरोनाभाइरस संकटका कारण आयमा अवरोध आएकाले युरोपका ठूला शहरमा बस्ने गरीबहरूमाझ सामाजिक अशान्ति छाउन सक्ने रेडक्रसका प्रमुखले चेतावनी दिएका छन् । 

संयुक्त राष्ट्रसंघको एक न्युज ब्रीफिङमा बोल्दै फ्रान्सेस्का रोच्चाले भने, ‘धेरै मानिसहरू सीमान्तीकृत अवस्थामा छन् जसलाई समाजको ब्ल्याक होल भन्ने गरिन्छ । ठूला शहरका बदनाम टोलहरूमा केही हप्तापछि सामाजिक समस्या देखिन थाल्ने डर छ ।’

‘यो यस्तो सामाजिक बम हो जुन कुनै पनि बेलामा विस्फोट हुन सक्छ किनकि गरीबहरूको आयस्रोत बन्द भएको छ ।’

पश्चिमी मुलुका ठूला शहरमा यी समस्याहरू केही हप्तामा देखिने उनको भनाइ छ । 

रोच्चाले इटलीको कोदोग्नो, बेर्गामो, ब्रेसिया र लोदीको भ्रमण गरेर यो निष्कर्ष निकालेका हुन् । 

केही मानिसहरू यताउता काम गरेर २० देखि २५ युरो कमाउँछन् र उनीहरू सामाजिक सहायता कार्यक्रमबाट बाहिरै हुन्छन्, रोच्चाले भने । 

इटलीमा रोच्चाले मेयरहरूलाई अनि एक लाख ८० हजार रेडक्रस स्वयंसेवकहरूलाई भेटेका थिए । स्वयंसेवकहरू घरैमा थुनिएका वृद्धहरूलाई भेट्छन्, उनीहरूका लागि खानेकुरा किन्छन् र औषधिपसलबाट औषधि किन्छन् । 

अन्तर्राष्ट्रिय रेडक्रसमा १९२ देशका एक करोड ४० लाख स्वयंसेवकहरू आबद्ध छन् । कोरोनाभाइरसको लडाइँमा जोखिममा परेका समूहहरूलाई सहायता गर्नका लागि रेडक्रसले बिहीवार ८० करोड स्विस फ्र्यांकको सहयोगका लागि अपील गरेको छ ।