३१ असार २०८३, बुधबार
अमेरिकी राष्ट्रपति डोनाल्ड ट्रम्पले विश्व स्वास्थ्य संगठन (डब्ल्युएचओ)लाई दिँदै आएको सहयोग रोक्ने घोषणा गरेपछि चीन आक्रोशित भएको छ ।
मंगलवार ट्रम्पले महामारीको सही व्यवस्थापन गर्न नसकेको र चीन केन्द्रित भएर काम गरिरहेको आरोप लगाउँदै डब्ल्युएचओलाई दिँदै आएको रकम रोक्ने घोषणा गरेका थिए । उनले सही ढंगबाट सूचना नदिएको आरोपसमेत लगाए ।
बुधवार चीनका विदेश प्रवक्ता जाओ लिजियानले ट्रम्पको घोषणालाई चीनले गम्भीर रूपमा लिएको बताए ।
‘अमेरिकी राष्ट्रपतिको यो घोषणाले डब्ल्युचओको काम गर्ने क्षमतालाई कमजोर बनाएको छ,’ प्रवक्ता लिजियानले भने, ‘चीनले डब्ल्युएचलाई सधैं समर्थन गरिरहन्छ । विश्वको जनस्वास्थ्यमा डब्ल्युएचओले खेलेको भूमिका र विश्वव्यापी महामारीको बेलामा चाल्नुपर्ने कदम सधैं प्रशंसनीय छ ।’
राष्ट्रपति ट्रम्पको घोषणालाई विश्व जनस्वास्थ्यका जानकार, नीति निर्माता र स्वयम् अरबपति बिल गेट्सले पनि आलोचना गरिरहेका छन् । ट्रम्पलाई अमेरिकी जनताले पनि आलोचना गरिरहेको समाचार ब्लूमबर्गले प्रकाशित गरेको छ ।
