२८ जेठ २०८३, बिहीबार
चीनमा तीन महिनासम्म लगाइएको बन्दाबन्दीपछि खुलेको विद्यालयमा विद्यार्थीहरूलाई सामाजिक दूरीका लागि एक मिटर लामो टोपी लगाउन आदेश दिइएको छ ।
घरैमा बनाइएको टोपीमा दुवै साइडमा लट्ठी राखिएको छ । त्यस्तो टोपी लगाएर कक्षामा पढिरहेका विद्यार्थीको एउटा भिडियो समेत सार्वजनिक भएको छ ।
एक मिटर लामो टोपीको अवधारणा झजियाङ प्रान्तको याङझेङ प्राथमिक विद्यालयले ल्याएको हो ।
होङ थर भएका प्रधानाध्यापकले टोपीका कारण विद्यार्थीहरू एकअर्कासँग सामाजिक दूरी राख्ने बताए ।
‘हामीले विद्यार्थीहरूलाई एकअर्कासँग कम्तीमा एक मिटर (तीन फीट) को दूरी राख्नका लागि एक मिटरको टोपी लगाउन भनेका हौं,’ होङले पत्रकारहरूलाई बताए ।
शिक्षकहरूले विद्यार्थीहरूलाई घरमा नै टोपी बनाउन आदेश दिएका थिए ।
विद्यार्थीहरूलाई आफ्ना सहपाठीसँग कुनै पनि भौतिक सम्पर्क नगर्न भनिएको छ अनि टोपी पनि नछुन भनिएको छ ।
