सत्तारूढ दल नेपाल कम्युनिस्ट पार्टी (नेकपा)का विदेश विभाग प्रमुख माधवकुमार नेपालले एक विज्ञप्ति जारी गर्दै कोभिड १९ का विरुद्ध लडिरहेका बेला भारतले नेपाली भूमिबाट चीनको मानसरोवर जाने बाटो बनाउनु दुखद र आपत्तिजनक रहेको जनाएका छन् ।

उनले भारतको यस्तो कार्यले दुई देश बीचमा यसअघि भएका सम्झौता र सहमतिहरूको गम्भीर उल्लङ्घन भएको उल्लेख गरेका छन् ।

‘नेपालको सार्वभौमसत्ता र अखण्डतामाथि प्रहार भएको हामीले महसुस गरेका छौं,’ उनले विज्ञप्तिमा उल्लेख गरेका छन्, ‘अतः हाम्रो पार्टी भारत सरकारको उक्त कदमको तीव्र विरोध गर्दै नेपाली भूमिभित्र कुनै पनि संरचना निर्माण र प्रयोग नगर्न आग्रह गर्दछ ।’

नेता नेपालको यो विज्ञप्ति अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले विज्ञप्ति निकालेपछि आएको हो । दुई अध्यक्षद्वारा संयुक्त रूपमा हस्ताक्षरित विज्ञप्ति शनिवार सार्वजनिक गरिएको थियो । उक्त विज्ञप्तिमा पनि नेपाली भूमिमा भारतले बनाएको सडक संरचनाको भ्रत्सना गरिएको छ ।