इराकमा आतंकवादी संगठन इस्लामिक स्टेट (आईएस) का लडाकूहरू गाउँहरूमा लुकेर बसेको र नयाँ आतंकवादी आक्रमणको षड्यन्त्र गरिरहेको पाइएको छ । 

उक्त देशमा रहेका नर्वेका सैनिकहरूले कोरोनाभाइरस संकटका कारण उत्पन्न चुनौतीको फाइदा उठाउँदै आईएस लडाकूहरूले पुनः एकजुट हुने काम थालेको बताए । 

‘भाइरसले अरूलाई शान्त बनाउँदा आईएसलाई चाहिँ सक्रिय बनाएको छ र थप आतंकवादी आक्रमणका लागि उनीहरू योजना बनाइरहेका छन्,’ कर्नेल लेफ्टिनेन्ट स्टाइन ग्रोङस्टाडले भर्डेन्स गाङ पत्रिकालाई बताए । 

‘उनीहरू राम्रो योजना बनाएर आक्रमणको रणनीति बुनिरहेका छन् र भाइरसका कारण राम्ररी समन्वय गर्न नपाएका इराकी बलहरूलाई विशेषगरी तारो बनाइरहेका छन् जस्तो हामीलाई लाग्छ । आईएसले रोड बम उपयोग गर्ने गरेको छ, उससँग अत्याधुनिक विस्फोटक छ र भारी हतियार पनि छ । उनीहरूले सीमाक्षेत्रको भूभागलाई आफ्नो फाइदाका लागि उपयोग गर्न जानेका छन् । अप्रिल महिनामा मात्र आनबार प्रान्तमा इराकी बलहरूमाथि आईएसले २० वटा आक्रमण गरेको थियो,’ ग्रोङस्टाडले बताए । 

नर्वेको टेलिमार्क बटालियन इराकमा रही इराकी सैनिकहरूलाई आतंकवादका विरुद्ध लड्न तालिम दिइरहेको छ । हालैका महिनामा उनीहरूले इराकी फौजसँग भौतिक सम्पर्क गर्न सकेको छैन किनकि महाव्याधि रोक्नका लागि सामाजिक दूरी अपनाउनुपरेको छ । आईएस चाहिँ गाउँहरूमा लुकेर बसेको छ र भाइरस संक्रमणको मारमा खासै परेको छैन । 

आईएसले आक्रमण गर्ने अनि हराउने हिट यान्ड रन रणनीति अपनाएको एक इराकी जनरलले बताए ।