अमेरिकाको रक्षा मन्त्रालय पेन्टागनका स्रोतहरूले प्रशान्त महासागरमा चीनसँग युद्ध भएमा अमेरिकाले हार्ने, ताइवानमाथिको आक्रमणको प्रतिरक्षा गर्न नसक्ने र गुआम सैन्य अड्डामा पनि खतरामा रहेको जानकारी दिएको छ । 

पेन्टागन स्रोतहरूका अनुसार, चीनले गर्ने आक्रमणको जोखिममा अमेरिका रहेको र कुनै पनि आक्रमणले अमेरिकालाई ठूलो आर्थिक क्षति हुने देखिएको छ । 

पेन्टागनको २०२० चाइना मिलिटरी पावर प्रतिवेदनमा यो चिन्ताजनक विश्लेषण समावेश गरिने अपेक्षा छ । 

कोरोनाभाइरस महाव्याधिको व्यवस्थापनका विषयमा अमेरिकाका राष्ट्रपति डोनल्ड ट्रम्पले चीनको कडा आलोचना गरेपछि दुई देशबीचको तनाव उच्च तहमा पुगेको छ । 

द टाइम्स पत्रिकासँग कुरा गर्दै रक्षा स्रोतहरूले चीनसँग भएका अट्याक सबमरिन, एयरक्राफ्ट क्यारियर्स र डिस्ट्रोयर्सले अमेरिकाको हतियारलाई निस्तेज तुल्याउने देखिएको बताए । 

हिन्द–प्रशान्त कमान्ड क्षेत्रमा रहेका अमेरिकाका सबै अड्डाहरू आक्रमणको जोखिममा छन् किनकि चीनले मध्यम दूरीको ब्यालिस्टिक क्षेप्यास्त्रको आपूर्ति बढाएको छ । 

अमेरिकाको तीनवटा सैन्य अड्डा रहेको गुआम चाहिँ बढी नै जोखिममा रहेको देखिएको छ । 

‘चीनसँग लामो दूरीको एन्टी–शिप ब्यालिस्टिक क्षेप्यास्त्रहरू र हाइपरसोनिक क्षेप्यास्त्रहरू छ,’ एक अमेरिकी रक्षा स्रोतले द टाइम्सलाई बताए । 

अमेरिकाका चीनविशेषज्ञहरूले पनि यस्तै किसिमका चेतावनी दिएका छन् । 

वाशिङटनमा रहेको सेन्टर फर स्ट्राटेजिक यान्ड इन्टरनेसनल स्टडीजको चाइना पावर प्रोजेक्टका निर्देशक बोन्नी ग्लेजरले द टाइम्सलाई बताएअनुसार, दुई देशबीच ताइवान अत्यन्तै संवेदनशील विषय हो र तनाव बढ्दै गएमा आणविक युद्धको स्थिति आउन सक्छ । 

दुई महाशक्तिबीचको राजनीतिक खिचातानीमा ताइवान फस्ने गरेको छ ।