१७ असार २०८३, बुधबार
कोरोना भाइरसको सङ्क्रमणबाट बच्न जारी बन्दाबन्दीको दुई महिना पूरा भई राजधानीमा कोभिड–१९ का सङ्क्रमित बढ्दै जाँदा उपत्यकामा सफाइ अभियान भने जारी छ ।
वाग्मतीका तीन स्थान गुह्येश्वरीमाथि, पशुपति क्षेत्र र शङ्खमूल क्षेत्रमा सफाइ गरिएको छ । वाग्मती सफाइ महाअभियानको ३६७औँ हप्तामा पशुपति क्षेत्रमा सफाइ अभियानकर्मी एवं अधिकार सम्पन्न वाग्मती सभ्यता एकीकृत विकास समिति सञ्चालक सदस्य माला खरेलले एक्लै सफाइ गरे ।
शङ्खमूल क्षेत्रको वाग्मती मनोहरा दोभानमा डा लक्ष्मी पौडेलको नेतृत्वमा सफाइ अभियान चलेको अभियानकर्मी किशोरसिंह शाहीले जानकारी दिनुभयो । वाग्मती सफाइ महाअभियान यही जेठ ५ गतेदेखि आठौँ वर्ष प्रवेश गरेको छ । विसं २०७० जेठ ५ गतेदेखि शुरु भएको सफाइ महाअभियान हिउँद, वर्षा, चाडपर्व, भूकम्प, कोरोनाको विश्वव्यापी महामारीमा पनि जारी छ ।
कोरोना भाइरसको सङ्क्रमणबाट बच्न गत चैत ११ गतेदेखि जारी बन्दाबन्दीका क्रममा चैत १५ गते आज भने अभियानकर्मी नदीमा पुग्न नसकेको जनाइएको छ । त्यस दिन सबै अभियानकर्मीले आआफ्नो टोल सफाइ गरेका थिए । त्यसपछिका आजदेखि भने नदीको नजिक घर भएका अभियानकर्मीले सफाइलाई निरन्तरता दिँदै आएका छन् ।
माथिल्लो वाग्मती सफाइ अभियान भनिने गुह्येश्वरीमाथि ३२७औँ हप्ताको सफाइ गरिएको छ । वाग्मती सुन्दरता सरोकार मञ्चको नेतृत्वमा भइरहेको यस क्षेत्रको सफाइ पनि बन्दाबन्दीकाबीच साङ्केतिकरुपमा सम्पन्न गरिएको अभियानकर्मी उत्तम पुडासैनीले बताए ।
यसैगरी मनोहरा नदी सफाइ अभियानको १६६औँ हप्ता चन्द्र दङ्गालको नेतृत्वमा नदी किनारको गुप्तेश्वर महादेव मन्दिर क्षेत्रमा गरिएको छ । बेबी राजभण्डारीको संयोजनमा ललितपुरको गोदावरी खोला सफाइ गरिएको छ । सबैतिरको सफाइ अभियान सरकारले बन्दाबन्दीका क्रममा जारी गरेको आचारसंहिताबमोजिम सामाजिक दूरी कायम गरी गरिएको जनाइएको छ ।
नदी किनार नजिकै घर हुने अभियानकर्मी नदीमै गएर सफाइ गरेको अभियानकर्मी शाहीले बताउनुभयो । निवास नदीभन्दा टाढा हुने अभियानकर्मीले भने आआफ्नो टोल सफाइ गर्नुभएको थियो ।
