अख्तियार दुरुपयोग अनुसन्धान आयोगले डिभिजन वन कार्यालय दोलखामा कार्यरत डिभिजन वन अधिकृत सन्तमाया श्रेष्ठविरुद्ध विशेष अदालत काठमाडौंमा भ्रष्टाचार मुद्दा दायर गरेको छ ।

काठ व्यापार गर्ने व्यापारीहरूसँग घुस/रिसवत रकम उठाई सरकारी गाडीमा दोलखाबाट काठमाडौं आउँदै गरेको भन्ने सूचना एवं उजुरीका आधारमा अख्तियार दुरुपयोग अनुसन्धान आयोग टंगालबाट खटिएको टोलीले श्रेष्ठलाई केही समय पहिले नियन्त्रणमा लिएको थियो ।

श्रेष्ठबाट बरामद भई दाखिला हुन आएको रकम रू २ लाख ३ हजार ५ सय रुपैयाँ जफत हुन माग दाबी लिई आज विशेष अदालत, काठमाडौंमा आरोपपत्र दायर गरिएको अख्तियारका प्रवक्ता प्रदीप कोइरालाले जानकारी दिए । 

‘डिभिजन वन कार्यालय, दोलखाका डिभिजन वन अधिकृत श्रेष्ठले कार्यालयबाट सेवा लिएका काठ व्यवसायीहरूसँग बिभिन्न बरबहानामा रकमको बार्गेनिङ गरी गर्न/लगाई आफ्नो जिम्मेवारी र पदीय दायित्व समेतको ख्याल नगरी बद्नियतपूर्वक काठ व्यवसायीहरूलाई अनुचित प्रभावमा पारी घुस/रिसवत दिन बाध्य पारी सो बापत रकम रू. २,०३,५००।– लिई निजबाट उक्त रकम बरामद भएको पुष्टि हुन आएकाले निजको उक्त कार्य भ्रष्टाचार निवारण ऐन, २०५९ को दफा ३ को उपदफा ९१० बमोजिमको कसूर अपराध भएको देखिदा बिगो रू‍. २,०३,५००।– (दुई लाख तीन हजार पाँच सय रुपैयाँ) कायम गरी निज सन्तमाया श्रेष्ठलाई भ्रष्टाचार निवारण ऐन, २०५९ को दफा ३ को उपदफा ९१० र दफा ३ को उपदफा (१) को खण्ड (घ)बमोजिम सजाय हुनुका साथै निजले घुस/रिसवत लिएको बरामद भई दाखिला हुन आएको रकम रू. २,०३,५००।– भ्रष्टाचार निवारण ऐन, २०५९ को दफा ३ को उपदफा ९१० बमोजिम जफत हुन मागदाबी लिई आज विशेष अदालत, काठमाडौंमा आरोपपत्र दायर गरिएको छ,’ अख्तियारको विज्ञप्तिमा उल्लेख छ । 
अख्तियारले श्रेष्ठलाई फागुन ३० गते घुससहित भक्तपुरबाट नियन्त्रणमा लिएको थियो ।