भारतका सेनाप्रमुख एमएम नरवणेले ११ दिनअघि कालापानीको विषयमा एक बयान दिँदै नेपालले कसैको इशारामा यसलाई उचालेको भनेका थिए र अहिले नेपालका रक्षामन्त्री ईश्वर पोखरेलले त्यसको खण्डन गरेका छन् । 

आजतक टेलिभिजनको अन्लाइन संस्करणमा प्रकाशित खबरअनुसार, भारतीय सेनाप्रमुखको भनाइले नेपाली गोर्खा सैनिकहरूको भावना आहत भएको भनी रक्षामन्त्री ईश्वर पोखरेलले बताएका छन् । 

आजतकले राष्ट्रिय समाचार समितिलाई रक्षामन्त्रीले दिएको अन्तर्वार्तालाई द राइजिङ नेपाल पत्रिकाबाट उद्धृतगरेको हो । कूटनीतिक विवादमा नरवणेले चीनतर्फ इशारा गर्नु निन्दनीय रहेको पोखरेलको भनाइ छ भनी आजतक लेख्छ । आवश्यक परेमा नेपाली सेनाले युद्ध समेत लड्ने (इफ नीडेड, इट विल फाइट) उनले बताएको उल्लेख गरिएको छ । 

नरवणेको बयान राजनीतिक बयानबाजी भएको र नेपाली सैनिकले यस्तो किसिमको राजनीतिक बयान कहिले पनि दिने नगरेको रक्षामन्त्रलीले अन्तर्वार्तामा बताएका छन् । 

भारतीय सुरक्षा बलमा नेपाली गोर्खाहरू भारत स्वतन्त्र हुनुभन्दा अघिदेखि नै रहेको र दुई देशबीचको विवादमा उनीहरूलाई टाढै राखिएको आजतक लेख्छ । भारतीय सेनामा लगभग ४० बटालियन गोर्खा सैनिक रहेको र तिनमा नेपाली सैनिकको संख्या ठूलो भएको जानकारी दिँदै आजतकले नेपालको रक्षामन्त्रीले भारत–नेपाल विवादमा गोर्खा समुदायलाई पहिलोपटक तानेको उल्लेख गरेको छ । 

तर नेपाली सेना यस विषयमा मौन रहेको र नेपाली सेनाका प्रवक्ता जनरल विज्ञानदेव पाण्डेले नरवणेको बयानमा प्रतिक्रिया दिन अस्वीकार गरेको आजतकमा लेखिएको छ । सोमवार पनि नेपाली सेनाका प्रवक्ताले नेपाली रक्षामन्त्रीको भनाइमाथि टिप्पणी गर्ने अधिकार आफूसँग नभएको बताएको भनी आजतक लेख्छ ।