२९ असार २०८३, सोमबार
पाँच पदाधिकारीको टुंगो लागेपछि जनता समाजवादी पार्टी (जसपा) निर्वाचन आयोग जाने भएको छ ।
समाजवादी पार्टीको तर्फबाट डाक्टर बाबुराम भट्टराई, उपेन्द्र यादव र राष्ट्रिय जनता पार्टीको तर्फबाट महन्थ ठाकुर अध्यक्ष रहने सहमति भएको छ भने थप दुई पदाधिकारीमा राजेन्द्र महतो र अशोक राई रहनेछन् ।
जसपाका नेता प्रशान्त सिंहले डाक्टर भट्टराई संघीय परिषदको अध्यक्ष रहने र यादव र ठाकुर केन्द्रीय समितिको अध्यक्ष रहने गरी सहमति भएको बताए ।
आइतवार अपराह्न जसपाका नेताहरू निर्वाचन आयोग जाने तयारी गरिरहेका छन् ।
'हामी समाजवादी पार्टीको कार्यालयमा जुटिसकेका छौं, केहीबेरमा आयोग जाँदैछौं,' सिंहले लोकान्तरसँग भने ।
अहिले पदाधिकारीको टुंगो लागेपनि थप नेताहरूको व्यवस्थापन गर्ने चुनौती जसपासामु छ । त्यो बिस्तारै गर्दै जाने सिंहले बताए ।
सरकारले दल विभाजन खुकुलो बनाउने अध्यादेश ल्याएपछि समाजवादी र राजपाको रातारात एकता भएको थियो । गत वैशाख १० नयाँ पार्टी जसपा बनाउने निर्णय नेताहरूले गरेका थिए ।
आयोगमा दल दर्ताको निवेदन दिएपछि राजनीतिक दलसम्बन्धी ऐन अनुसार ४५ दिनभित्र एकताका सम्पूर्ण कामहरू पूरा गरिसक्नुपर्ने थियो ।
उक्त मिति हिजै सकिएको भएतापनि हिजो शनिवार परेकाले नयाँ दल आज दर्ता हुने भएको हो ।
