लद्दाखको गलवान उपत्यकामा भारतीय र चिनियाँ सैनिकबीच सोमवार राति भएको हिंस्रक भिडन्तमा दुवैतर्फ हताहती भएको भनी भारतीय सेनाले अघिल्लो बयान सच्याएको छ । 

अघिल्लो बयानमा उसले भारतीय सैनिकतर्फको हताहतीको मात्र जानकारी दिएको थियो । एक कमान्डिङ अफिसर र दुई जवानको मृत्यु भएको पुष्टि उसले गरेको थियो ।

भारतीय र चिनियाँ सैनिकहरूले रड र ढुंगा लिएर भिडन्त गरेका थिए । मे ५ र ६ मा पांगोङ त्सोको उत्तरी किनारमा पनि यस्तै भिडन्त भएको थियो । त्यसमा दुवै पक्षका सैनिकहरू घाइते भएका थिए । 

दुई देशबीच तनाव उत्पन्न भएपछि वास्तविक नियन्त्रण रेखाको ३४ सय ८८ किलोमिटर लामो क्षेत्रका विभिन्न ठाउँमा सैन्य उपस्थिति बढाइएको छ । 

वास्तविक नियन्त्रण रेखामा यसअघि भएमा भिडन्तमा सन् १९७५ पछि कसैको पनि मृत्यु भएको थिएन । त्यतिखेर अरुणाचल प्रदेशमा असम राइफल्सको गश्ती एम्बुशमा पर्दा चारजना जवान मारिएका थिए । 

चीनको पत्रिका ग्लोबल टाइम्सले भारतीय सैनिकहरू चिनियाँ सीमामा प्रवेश गरेको अनि सेनालाई उत्तेजित तसल्याएकाले गम्भीर भिडन्तको स्थिति आएको र वार्ताका माध्यमले समस्या समाधान गर्नुपर्ने भनी परराष्ट्मन्त्री वाङ यीको भनाइ उद्धृत गर्दै खबर दिएको छ ।