सुदूरपश्चिम प्रदेश सभाको आजको बैठक प्रतिपक्षी दल नेपाली कांग्रेस र राष्ट्रिय जनता पार्टीको अवरोधपछि स्थगित भएको छ ।

बैठक प्रारम्भ हुनासाथ आफ्नो आसनबाट उठेर प्रतिपक्षी दलका सदस्यले अवरोध गरेपछि सभामुख अर्जुनबहादुर थापाले बजेट माथिको छलफल गर्ने पहिलो दिन भएकोले आफ्नो आसनमा बस्न आग्रह गरेका थिए ।

सभामुखको आग्रहपछि पनि प्रतिपक्षी सदस्य आफ्नो आसनमा नबसेपछि एक जनालाई आफ्नो भनाइ राख्न अनुमति दिएका थिए ।

त्यसपछि नेपाली कांग्रेस संसदीय दलका नेता डा. रणबहादुर रावलले क्वारेन्टीनमा बसेका नागरिकलाई विना स्वास्थ्य जाँच घर पठाउने कार्य भइरहेको, उनीहरूको पीसीआर जाँच नहुँदा सङ्क्रमणको थप जोखिम बढेको क्वारेन्टीनको अवस्था लथालिंग भई जनता त्रसित हुँदा पनि प्रदेश सरकार गम्भीर नभएको भन्दै तत्काल पीसीआरबाट स्वास्थ्य जाँचको व्यवस्था गर्न र नागरिकलाई व्यवस्थित क्वारेन्टीनको व्यवस्था गरी रोग नियन्त्रणमा प्रभावकारी काम गर्न माग गरे ।

त्यसपछि पनि प्रतिपक्षी सदस्य आफ्नो आसनबाट उठेर विरोध गरेपछि सभामुखले बैठक स्थगन गरिएको जानकारी गराएका थिए ।

आजको बैठकमा सरकारको आगामी आर्थिक वर्षका लागि ल्याइएको बजेट कार्यक्रममाथि छलफल शुरु गर्ने कार्यसूची रहेको थियो ।