०३ असार २०८३, बुधबार
तराई तथा पूर्वी पहाडी क्षेत्रमा वर्षा शुरू भएसँगै सप्तकोशी नदीमा पानीको बहाव बढ्ने क्रम शुरू भएको छ । तीन दिनदेखि लगातार परेको वर्षाका कारण सप्तकोशीमा पानीको बहावमा वृद्धि भएको जिल्ला प्रहरी कार्यालय सुनसरीले जनाएको छ ।
आज मध्याह्न १२ बजे गरिएको मापनअनुसार कोशी ब्यारेज भएर एक लाख ७६ हजार ५१० क्युसेक प्रति सेकेन्ड पानीको वहाव रहेको जिल्ला प्रहरी कार्यालय सुनसरीका प्रहरी नायब उपरीक्षक विनोद शर्माले बताउनुभयो । अहिले कोशी ब्यारेकका २६ ढोका खुला गरिएको छ ।
बिहीबार बिहान कोशी व्यारेज भएर एक लाख सात हजार क्युसेक प्रति सेकेन्ड तथा १२ ः०० बजे एक लाख १८ हजार क्युसेक प्रति सेकेन्ड पानीको बहाव थियो । आज बिहान ९ ः ०० बजे गरिएको मापनअनुसार भने एक लाख ५९ हजार ९४० क्युसेक प्रति सेकेन्ड पानीको बहाव रहेको थियो । कोशी ब्यारेजका २४ ढोका खुला गरिएको थियो ।
कोशीमा पानीको बहाव बढ्ने क्रम शुरू भए पनि ब्यारेजमा कुनै खतरा नरहेको सुनसरीका प्रहरी नायब उपरीक्षक शर्माले बताए।
