१९ असार २०८३, शुक्रबार
लामो लकडाउनले औद्यौगिक क्षेत्र धरासायी बनेको भन्दै उद्योगीहरूले बैंकको व्याजमा छुट दिन माग गरेका छन् ।
साढे ३ महिनादेखिको लकडाउनले केही उद्योग अझै बन्द अवस्थामा रहेका छन् ।
सञ्चालनमा आएका उद्योगहरू पनि मजदुर अभावले पूर्ण क्षमतामा चल्न नसक्दा हुँदै बैंकको व्याजमा छुट र किस्तामा पुर्नताजगी गर्न आग्रह गरेका हुन् ।
रूपन्देही उद्योग संघले मंगलवार बुटवलमा पत्रकार सम्मेलन गरी उद्योगीहरूले कर, बैंक व्याज किस्ता तथा कर्जा रकम एकैपटक तिर्न सक्ने अवस्था नभएकाले यसको अवधि लम्बाउन आग्रह गरेको हो ।
संघका अध्यक्ष बाबुराम बोहोराले तहसनहस भएको औद्योागिक क्षेत्रलाई बचाउन बैंकमा उद्योगीले बुझाउनुपर्ने व्याज, कर्जाको किस्ता र तिर्ने समयअवधि बढाइदिन आग्रह गरे । बोहोरा थला परको उद्योग उद्योगीहरुले बैंक तथा वितीय संस्थाबाट लिएको कर्जाको लकडाउन अवधिभरको व्याजदरमा ५० प्रतिशत छुटको व्यवस्था गरिनुपर्ने बताए ।
उनले भने, ‘उद्योगीहरूले पटक–पटक राहत प्याकेज लागि सरकारसँग आग्रह गर्दै आइरहँदा पनि कुनै माग सम्बोधन भएनन् । राज्यले घोषणा गरेका छुटका स्किमहरू पनि कार्यान्वन भएनन् । यस्तो अवस्थामा व्यवसायीहरू धरासायी बन्दै छन् ।’
सरकारले बजेटमा घोषणा विद्युत्को डिमाण्ड शुल्क छुट दिने बताए पनि विद्युत् महसूल तिर्न जाँदा उद्योगीहरूले रकम छुट नपाएको बताएका छन् । रुपन्देहीमा १ हजार २०० उद्योगी छन् । काठमाडौंपछि सबैभन्दा बढी उद्योगधन्दा भएको जिल्ला रुपन्देही पर्छ ।
