भारतको माध्यमिक तहको परीक्षा बोर्ड सीबीएसईले विद्यालयको पाठ्यक्रमबाट लोकतान्त्रिक अधिकार, खाद्य सुरक्षा, संघीयता, नागरिकता, धर्मनिरपेक्षता लगायतका पाठहरू हटाएको छ । कोरोनाभाइरस संकट चलिरहँदा विद्यार्थीहरूको बोझ कम गर्न यी पाठहरू हटाइएको हो ।
 

सीबीएसईले मंगलवार यस विषयको घोषणा गर्दै सन् २०२०–२१ को पाठ्यक्रम एकतिहाइले घटाउने किनकि अहिले कोरोना महाव्याधिका कारण असाधारण परिस्थिति बनेको जानकारी दियो । 

बोर्डले कक्षा ९ देखि १२ सम्मका अर्थशास्त्र र राजनीतिशास्त्रका पाठ्यक्रमलाई पुनरवलोकन गरेको हो । 

कक्षा ११ को राजनीतिशास्त्रबाट संघीयता, नागरिकता, राष्ट्रवाद र धर्मनिरपेक्षता पूरै हटाइएको हो । 

स्थानीय सरकार अध्यायबाट दुईवटा एकाइ मात्र हटाइएको छ । 

भारतको विदेशनीति अन्तर्गत छिमेकी पाकिस्तान, बंगलादेश, नेपाल, श्रीलंका र म्यानमारसँगको सम्बन्धका विषयमा एक अध्याय पूरै हटाइएको छ । 

एनडीटीभीबाट