गौशाला, २० वैशाख– आसन्न स्थानीय निर्वाचनलाई लक्षित गरी जिल्ला प्रशासन कार्यालय महोत्तरीले जिल्लामा रहेको हतियार बुझाउन गरेको सूचनाअनुसार तीनजनाले मात्रै हतियार बुझाएका छन् ।

जिल्ला प्रशासन कार्यालयका अनुसार महोत्तरीमा तीनसय नौजनाले अनुमति प्राप्त गरी तीनसय ३२ थान हतियार राखेकामा जम्मा तीनजनाले मात्रै हतियार बुझाएका हुन् ।

स्थानीय तहको चुनावलाई मध्यनजर गर्दै जिल्ला प्रशासन कार्यालयले करिब डेढ महिनाअघि हतियार बुझाउन सूचना जारी गरेपनि अहिलेसम्म मात्र तीनजनाले आफूसँग रहेको हतियार बुझाएको प्रमुख जिल्ला अधिकारी वीरेन्द्र यादवले बताए ।

जिल्लामा अनुमति प्राप्त हतियारमा पेस्तोल १२, बाह्र बोरको बन्दुक एकनाले १ सय ८०, दुईनाले एकसय २३, बाईस बोरको एकनाले ६, भरुवा बन्दुक एकनाले दुई, हावादारी नौ गरी कुल तीनसय ३२ हतियार अनुमति प्राप्त रहेको जिल्ला प्रशासन कार्यालय महोत्तरीको तथ्याङ्क छ ।

जिल्लामा हतियार राख्नेमा जिल्लाको सदरमुकाम जलेश्वर नगरपालिकाका विभिन्न वडा, गौशाला र बर्दिवास नगरपालिकाका विभिन्न वडाका साथै साबिकका पिपरा, डाम्हीमडै, सुन्दरपुर, धिरापुर, पर्सापतैली, एकरहिया, रामगोपालपुर, सम्सी, मनरालगायतका बासिन्दा रहेका छन् ।