२९ जेठ २०८३, शुक्रबार
बेलारुसमा बहालवाला राष्ट्रपति अलेक्जेन्डर लुकाशेन्कोविरुद्ध उठेकी विपक्षी नेता चुनाव हारेपछि ‘आफ्ना बालबच्चाको हित’का लागि लिथुआनियातिर भागेकी छन् ।
स्वेत्लाना तिखानोभ्स्काया परिवार सहित देश छोडेर लिथुआनिया पुगेकी हुन् । चुनावमा लुकाशेन्कोले विजयी भएको घोषणा गरेका छन् ।
लुकाशेन्को पुनः विजयी भएपछि धाँधली गरेर चुनाव जितेको भन्दै बेलारुसवासीहरू आन्दोलित भएका छन् । लगातार तीन दिनदेखि राजधानी मिन्स्क र अन्य स्थानमा हिंसा भड्किएको छ । हिंसामा परी एकजनाको मृत्यु भएको छ ।
लुकाशेन्कोले छैटौं कार्यकाल चलाउनका लागि ८० प्रतिशत भोट चोरेको आरोप विरोधकर्ताहरूले लगाउँदै प्रदर्शन गरेका हुन् । उनीहरूले प्रहरीलाई ढुंगामुढा र पटका फ्याँकेका छन् । प्रहरीले उनीहरूमाथि अश्रूग्यास र रबरको गोली प्रहार गरेको छ ।
देश छोड्नुअघि यूट्युबमा एउटा भिडियो पोस्ट गर्दै तिखानोभ्स्कायाले भनिन्, ‘यो निर्वाचन अभियानले मलाई बलियो बनाएको जस्तो लागेको थियो । म जे पनि सहन सक्ने गरी मजबूत बनेको जस्तो लाग्थ्यो । तर म पहिले जस्तै कमजोर महिला रहेछु । मैले अप्ठ्यारो निर्णय लिएँ र पूर्ण स्वतन्त्र रूपमा लिएँ । अहिले भइरहेको घटनाक्रममा एउटा जीवन पनि गुम्नु हुँदैन । बालबालिका हाम्रो जीवनको सबभन्दा महत्त्वपूर्ण कुरा हुन् ।’
सन् १९९४ देखि सत्ता चलाइरहेका लुकाशेन्कोलाई अपदस्थ नगरुन्जेल विरोध प्रदर्शन गरिरहने विरोधकर्ताहरूले बताएका छन् ।
