२२ असार २०८३, सोमबार
अमेरिकी व्यवसायी इलोन मस्कले न्युरालिंकको प्रोटोटाइप सार्वजनिक गरेका छन् । मस्तिष्कमा राखिने उक्त चिपले कोशिकाहरूसँग संवाद गर्न सक्छ ।
यसलाई केही मानिसले रोग निको पार्ने माध्यम मान्छन् भने केहीले दुःस्वप्न हो भन्छन् ।
मस्कको न्युरालिंक एक सुँगुरमा जडान गरेर शुक्रवार देखाइएको थियो । यसले मस्तिष्क र मेरुदण्डका अनेकौं समस्याको उपचार गर्ने उनले बताए । स्मरणशक्तिको क्षय, अन्धोपन, मुटु बाउँडिने समस्या, हृदयघात र लागूऔषध दुर्व्यसन लगायतका समस्या यसले निको पार्ने बताइएको छ ।
‘
म तपाईंलाई हामीसँग भएको कुरा देखाउन पाउँदा उत्साहित छु । यसले तपाईंको दिमाग हल्लाउनेछ,’ मस्कले प्रस्तुतिको आरम्भमा भने ।
गर्ट्रुड नामक पोथी सुँगुरलाई खोरबाट निस्कन लगाएर मस्कले त्यसको मस्तिष्कको गतिविधि न्युरालिंकले रियलटाइममा कसरी अध्ययन गरिरहेको छ भनी देखाए । कुल तीन सुँगुरमा उनले न्युरालिंक राखेकोमा दोस्रो सुँगुरमा पहिले नै जडान गरिएको डिभाइस हटाइएको थियो । डिभाइस हटाएपछि मानिसले कसरी स्वस्थ र आनन्दित जीवन बाँच्न सक्छ भनी यसबाट देखिने मस्कदले बताए । तेस्रो सुँगुरमा चाहिँ कुनै डिभाइस राखिएको थिएन र त्यो शायद ‘कन्ट्रोल’ थियो ।
पछि गएर यस डिभाइसलाई ब्लूटूथमार्फत स्मार्टफोन यापमा जोड्न मिल्ने अनि मस्तिष्कमा अनेकौं औषधोपचार र संगीत समेत राख्न मिल्ने मस्कको कम्पनीले आशा गरेको छ ।
मस्कले यो जडान एक घन्टाभित्र जडान गर्न सकिने विश्वास लिएका छन् । उनले भने, ‘तपाईं बिहान अस्पताल जानुभयो भने अपराह्नमा त्यहाँबाट निस्कन सक्नुहुन्छ र बेहाश नबनाइकनै उपचार हुन्छ ।’
अमेरिकाको औषधि नियमन संस्था फूड यान्ड ड्रग एडमिनिस्ट्रेसनले न्युरालिंकलाई ब्रेकथ्रु डिभाइसकोसंज्ञा दिँदै यसमा थप परीक्षण गर्न अनुमति दिएको छ । मस्कले चाहिँ यो अहिले आरम्भिक चरणमै रहेको र जटिल समस्याहरू समाधानका लागि थुप्रै काम गर्न बाँकी रहेको बताए । शुक्रवारको प्रस्तुति मानिसलाई यसप्रति आकर्षित गर्नका लागि भएको उनको कथन छ ।
अमेरिकाको सान फ्रान्सिस्कोमा रहेको न्युरालिंक कर्पोरेसन मस्कले सन् २०१६ मा सहसंस्थापना गरेका हुन् । कम्पनीले मस्तिष्कलाई हजारौं इलेक्ट्रोडका साथ कम्प्युटरसँग जोड्न मिल्ने ताररहित इम्प्लान्टहरू विकसित गर्ने लक्ष्य लिएको छ । यसले अन्ततोगत्वा मानिसहरूलाई कृत्रिम बौद्धिकतासँग एकाकार गराउनेछ ।
