बुटवल, १७ मंसिर – पाँच नम्बर प्रदेशबाट पहाडी जिल्ला अलग्याउने गरी सरकारले गरेको संविधान संशोधन प्रस्तावबिरुद्ध रुपन्देहीको बुटवलमा विशाल प्रदर्शन भएको छ । बुटवलको पुष्पलाल चोकमा भएको विरोधसभामा हजारौं सहभागी भएका थिए । २०६२/६३ सालको जनआन्दोलनपछि पहिलो पटक प्रमुख तीन दलका कार्यकर्ताहरू एकै ठाउँमा भेला भएका हुन् ।

वुटवलमा शुक्रवार भएको प्रदर्शनलाई रुपन्देहीका स्थानीयवासीले अहिले सम्मकै ठूलो भएको प्रतिक्रिया दिएका छन् । प्रदेश टुक्र्याउने प्रस्तावको विरुद्धमा आयोजित विरोध सभालाई नेकपा एमालेका उपाध्यक्ष वामदेव गौतम, माओवादी केन्द्रका नेता टोपबहादुर रायमाझी र कांग्रेस नेता चन्द्र चण्डारी लगायतले सम्बोधन गरेका छन् ।