बुटवल उपमहानगरपालिकाले सडकमा रात बिताउन बाध्य बेसहारा सहयोगापेक्षीको उद्धार गरी निःशुल्क पीसीआर परीक्षण थालेको छ ।

बुटवललाई सडकमानवमुक्त घोषणा गरिसकिएको छ । घोषणा गरेयता सडकमा फेला पर्ने कुनै पनि बेसहारा तथा सहयोगापेक्षीलाई तत्काल उद्धार गरिँदै आएको छ । 

आफन्तविहीन भएर सडकमा बेवारिसे जीवन बिताएका बेसहारालाई कोरोना संक्रमण हुनसक्ने र जीवन रक्षा गर्ने उद्देश्यले पीसीआर परीक्षण शुरू गरिएको उपमहानगरपालिकाका प्रमुख शिवराज सुवेदीले बताए  ।  

लकडाउनको अवधिमा बुटवल उपमहानगरपालिकाले २८ जना बेसहाराको उद्धार गरी बुटवलस्थित मानव सेवा आश्रममा राखेको प्रमुख सुवेदीले बताए । यसमध्ये ८ जनाको पीसीआर परीक्षणका लागि स्वाब संकलन गरिएको र रिपोर्ट आइसकेको छैन । उद्धार गरिएकालाई अलग्गै राख्ने व्यवस्था मिलाइएको छ । 

पीपीई लगाएका उद्धारकर्ता र स्वास्थ्यकर्मीले मानवीय सहयोगका काम निरन्तर गर्दै आएका छन् । बुटवल उपमहानगरले सहयोगापेक्षीको उद्धार र व्यवस्थापनमा समेत सहयोग गरेको मानव सेवा आश्रम रुपन्देही जिल्ला संयोजक सरु अधिकारीले जानकारी दिइन् । उनका अनुसार बुटवल क्षेत्रबाट मात्रै लकडाउनको अवधिमा २८ जनाको उद्धार गरिएको छ भने प्रदेश ५ भरि ४५ जनाको उद्धार गरिएको छ ।