नेकपा उपाध्यक्ष एवं राष्ट्रिय सभाका नव नियुक्त सदस्य वामदेव गौतमले नेपालमा समाजवाद स्थापना गर्ने नेकपाको संकल्प पूरा गर्न राष्ट्रिय सभामा भूमिका खेल्ने बताएका छन् ।

राष्ट्रिय सभाको गरिमा बढाउनका लागि निर्वाह गर्नुपर्ने कर्तव्य पूरा गर्ने उनले बताए । 

संसद् सचिवालयमा बिहीवार राष्ट्रिय सभा सदस्यको शपथ लिएपछि संक्षिप्त सम्बोधन गर्दै गौतमले मुलुकको पक्षमा काम गर्ने बताएका हुन् ।

राष्ट्रपति विद्यादेवी भण्डारीले बिहीवार दिउँसो नै गौतमलाई राष्ट्रिय सभा सदस्यमा नियुक्त गरेकी थिइन् ।

‘राष्ट्रिय सभाको गरिमा बढाउनका लागि संविधान र नियमावली अनुसार मैले निर्वाह गर्नुपर्ने कर्तव्य पूरा गर्न आएको छु । मैले यो सभाको सदस्य रहँदासम्म कहिले पनि राष्ट्रिय सभाको गरिमा र प्रतिष्ठा गिराउने कुनै क्रियाकलाप गर्ने छैन,’ गौतमले भने, ‘मैले राष्ट्रिय सभाको जिम्मेवारी पूरा गर्दा नेपालको स्वतन्त्रता, राष्ट्रियता, सार्वभौमिकता र नेपाली जनताप्रति सधैँ बफादार भएर मैले आफ्नो कर्तव्य निर्वाह गर्नेछु ।’ 

गौतमले नेपालमा समाजवाद स्थापना गर्ने नेकपाको संकल्प राष्ट्रिय सभामा रहेर पूरा गर्ने बताए ।

‘हाम्रो पार्टी (नेकपा)ले नेपालमा समाजवाद स्थापना गर्ने संकल्प गरेको छ, त्यो संकल्पबमोजिम त्यो कार्य सम्पन्न गर्नका लागि के कति भूमिका निर्वाह गर्नसक्छु, त्यो भूमिका गर्नेछु,’ गौतमले भने । 

हेर्नुहोस्, भिडियो :

गौतमले आफूलाई राष्ट्रिय सभामा सिफारिश गरेकोमा प्रधानमन्त्री केपी ओली र पार्टीलाई धन्यवाद दिए । गौतमको शपथ समारोहमा नेकपाका अध्यक्ष पुष्पकमल दाहाल प्रचण्ड पनि पुगेका थिए । 

सिंहदरबारस्थित संसद् सचिवालयमा बिहीवार आयोजित समारोहमा राष्ट्रिय सभा अध्यक्ष गणेश तिमिल्सिनाले गौतमलाई शपथ गराएका हुन् । आफूले पार्टी सदस्यता दिएका तिमल्सिनाबाट राष्ट्रिय सभा सदस्यको शपथ लिन पाएकोमा आफ्नो छाति फुलेको गौतमले बताए । 

नेकपा सचिवालयका ९ जना सदस्यमध्ये गौतम मात्र संसद् बाहिर थिए । राष्ट्रिय सभामा गौतमको कार्यकाल ६ वर्ष हुनेछ । 

सचिवालयका ९ मध्ये ६ जना प्रतिनिधि सभाको सदस्य छन् ।

गौतमसहित रामबहादुर थापा र नारायणकाजी श्रेष्ठ राष्ट्रिय सभाको सदस्य छन् । 

राष्ट्रिय सभामा प्रतिनिधित्व गर्ने गौतम नेकपाको वरिष्ठ नेता हुनेछन् । अहिले राष्ट्रिय सभामा नेकपा संसदीय दलको नेता दीनानाथ शर्मा छन् ।

२०७६ फागुन २१ गते डा. युवराज खतिवडाको कार्यकाल सकिएपछि राष्ट्रिय सभामा एक सदस्य रिक्त थियो ।

गत फागुन १४ गते बसेको नेकपा सचिवालय बैठकले गौतमलाई राष्ट्रिय सभा सदस्यमा नियुक्तिका लागि प्रधानमन्त्रीलाई सुझाव दिएको थियो ।

त्यसको ६ महिनापछि भदौ १८ गते सचिवालयले पुनः गौतमलाई राष्ट्रिय सभामा पठाउने निर्णय गरेको थियो ।