२५ जेठ २०८३, सोमबार
आन्तरिक उडान खुला भएसँगै पोखरा विमानस्थलमा पनि सोमवारदेखि चहलपहल शुरू भएको छ ।
कोरोना भाइरस जोखिमसँगै गत चैत ११ गतेदेखि सरकारले लागू गरेको लकडाउन र निषेधाज्ञाका कारण ६ महिनादेखि देशैभरका विमानस्थल सुनसान थिए ।
काठमाडौंबाट पोखराको लागि २ उडान भइसकेका छन् । बुद्ध एयरको जहाज ६ महिनापछि ५ बच्चासहित ५६ यात्रु बोकेर बिहान ८ः४५ बजे पहिलो पटक पोखरामा अवतरण भएको छ ।
बुद्ध एयरका पोखरास्थित स्टेसन इञ्चार्ज गौतम बरालका अनुसार कूल ७२ सिटे जहाज आवश्यक स्वास्थ्य सुरक्षा मापदण्ड अपनाउँदै ५६ यात्रु आएकोमा पुनः पोखरा–काठमाडौं उडानका लागि ९ः४५ बजे ५८ यात्रु बोकेर उडेको छ । यात्रुको चाप हेरेर आगामी दिनमा बिस्तारै उडान संख्या बढाउँदै जाने गौतमले बताए ।
बुद्धपछि काठमाडौंबाट पोखराका लागि यति एयरलाइन्सले उडान भरेको हो । ३० सिट क्षमतामा सबै सिट भरिएको थियो । एयरलाइन्सका प्रवक्ता सुदर्शन बर्तौलाका अनुसार देशभर यतिले पोखरा, भद्रपुर, नेपालगञ्ज, भैरहवा, जनकपुर, भरतपुर, विराटनगर र वीरगञ्ज गरी १० उडान भर्दैछ ।
काठमाडौं–पोखरा उडान भरेका बुद्ध र यति काठमाडौं फर्किसकेकोमा दिउँसो ३ बजेपछि पुनः पोखराका लागि उडान भरेर काठमाडौं फर्किने तालिका रहेको पोखरा नागरिक उड्डयन कार्यालयका सूचना अधिकारी देवराज सुवेदीले जानकारी दिए । उनका अनुसार प्राधिकरणको अनुमतिसँगै कोरोना भाइरसविरुद्ध आवश्यक स्वास्थ्य सुरक्षा मापदण्ड अपनाएर उडान थालिएको हो । उनका अनुसार विगतमा हवाइजहाज, हेलिकप्टर र अल्ट्रालाइट गरी १०० वटासम्म उडान हुने गर्दथे । विमान कम्पनीबाट सरदर ४० उडान हुने गरेको थियो । जसमा काठमाडौं–पोखरा सरदर २२ देखि २५, पोखरा–जोमसोम ८ देखि १०, पोखरा–भैरहवा २, पोखरा–भरतपुर १, पोखरा–विराटनगर १ वटासम्म उडान हुने गर्दथ्यो ।
बुद्ध एयरबाट पोखरा ओर्लिएका यात्रु जितेन्द्रप्रसाद कलवारले लामो समयपछि जहाज चढ्दा नौलो अनुभूति भएको प्रतिक्रिया दिए । काठमाडौंका कलवार पोखरामा व्यापारका सिलसिलामा विगतमा पनि जहाजबाटै पोखरा आइरहन्थे ।
नेपाल नागरिक उड्डयन प्राधिकरणले स्वास्थ्य सुरक्षाका मापदण्ड निर्धारण गरी उडान गर्न एयरलाइन्सलाई अनुमति दिएसँगै करीब २५ प्रतिशत संख्यामा उडान भर्न थालिएको हो ।
विमानस्थलको भीड व्यवस्थापन तथा माग आधारमा उडानको कोटा निर्धारण गरिएको छ । उडान गर्दा यात्रुले अनिवार्य रुपमा मास्क प्रयोग गर्नुपर्नेछ । विमानस्थलभित्र ‘वास प्वाइन्ट’ राख्नुपर्ने छ भने ‘फेसशिल्ड’ समेत विमान कम्पनीले यात्रुलाई उपलब्ध गराउनुपर्नेछ । जसको लागत यात्रुको टिकटमै जोडिएको हुन्छ ।
कोरोना भाइरसको संक्रमणसँगै शुरू भएको लकडाउनले बन्द रहेको आन्तरिक तर्फको नियमित उडान खुले पनि अवस्था हेरी हाललाई न्यूनतम संख्यामा मात्रै उडान सञ्चालन गर्ने वायुसेवा कम्पनीले जनाएका छन् ।
भदौ १ गतेदेखि नै आन्तरिक तर्फका उडान खोल्ने तयारी भए पनि विमान कम्पनीले क्षमताअनुसार यात्रु बोक्न नपाउने सरकारी शर्तका कारण उडान रोकेका थिए । नागरिक उड्डयन प्राधिकरणका प्रवक्ता राजेन्द्रकुमार क्षत्रीका अनुसार यात्रु चाप भएको क्षेत्रमा उडान भर्ने गरी विमान कम्पनीले अनुमति पाएका छन् ।
