काठमाडौँ, २५ बैशाख- सरकारले सामान्य प्रशासनमन्त्रीको अध्यक्षतामा अधिकारसम्पन्न संघीय प्रशासनिक पुनर्संरचनासम्बन्धी उच्चस्तरीय निर्देशक समिति गठन गरी प्रशासनिक पुनर्संरचनाको कार्य अघि बढाएको छ । सामान्यका सहायक प्रवक्ता नन्दराज ज्ञवालीले समितिले प्रशासनिक पुनर्संरचनाका लागि प्रारम्भिक कार्य थालेको जानकारी दिए । ‘समितिले काम थालिसकेको छ, आवश्यक खाका र मोडालिटीबारे छलफल गर्न २६ वैशाखमा बैठक बोलाइएको छ,’ सहायक प्रवक्ता ज्ञवालीले भने ।

सरकारले २१ वैशाखमा सामान्य प्रशासनमन्त्री केशवकुमार बुढाथोकीको अध्यक्षतामा प्रमुख राजनीतिक दलका नेता तथा सांसदहरूलाई समेटेर समिति गठन गरेको थियो । समिति सदस्यमा सांसद राजेन्द्रप्रसाद पाण्डे, रेखा शर्मा, डा. आरजु देउवा राणा र पूर्वराज्यमन्त्री भुवन पाठक छन् । समितिको सदस्यसचिवमा सामान्य प्रशासन मन्त्रालयका सचिव मोहनकृष्ण सापकोटा छन् ।

संवैधानिक प्रावधानअनुसार देश संघीय प्रणालीमा प्रवेश गरेको र सोहीअनुसारको प्रशासनिक पुनर्संरचना गरी कर्मचारी समायोजन गर्नेलगायतका महत्वपूर्ण जिम्मेवारी पूरा गर्न सामान्य प्रशासनमन्त्री बुढाथोकीको नेतृत्वमा उच्चस्तरीय समिति गठन गरिएको हो । सरकारले यसअघि प्रधानमन्त्रीको अध्यक्षतामा संघीयता कार्यान्वयन तथा प्रशासन पुनर्संरचनासम्बन्धी उच्चस्तरीय निर्देशक समिति र मुख्यसचिव डा. सोमलाल सुवेदीको संयोजकत्वमा उच्चस्तरीय समन्वय समिति गठन गरी कार्य प्रारम्भ गर्दै आएको छ, नयाँ पत्रिकामा खबर छ ।