१६ असार २०८३, मंगलबार
भारतको तमिलनाडुस्थित तिरुपुरमा एक व्यक्तिले दुई पत्नी हुँदाहुँदै तेस्रो विवाहको कोशिश गरेपछि दुवै पत्नीले बेस्सरी कुटपिट गरेका छन् ।
दिनेश रासिपलायम नामक २६ वर्षीय व्यक्ति एक निजी कम्पनीमा काम गर्छन् । उनले सन् २०१६ मा तिरुपुरकै प्रियदर्शिनीसँग विवाह गरेका थिए । बिहेको केही दिनपछि नै उनले प्रियदर्शिनीलाई अपशब्द बोल्दै कुटपिट गर्न थालेको आरोप छ । सहन नसकेपछि प्रियदर्शिनीले दिनेशलाई छोडेर माइतमा बस्न थालिन् । यो घटना केही समय अघिको हो ।
त्यसपछि सन् २०१९ मा दिनेशले म्याट्रिमोनियल साइटमा भेटिएकी अनुप्रियासँग विवाह गरिन् । अनुप्रिया डिभोर्सी थिइन् । अनुप्रियालाई पनि दिनेशले कुटपिट गर्न थालेको आरोप छ । अपशब्द बोल्ने, कुटपिट गर्ने अनि दाइजो नल्याएको भन्दै व्यंग्य गर्ने काम गरेपछि अनुप्रिया पनि उसलाई छोडेर माइतमा बस्न थालिन् ।
गत साता अनुप्रिया र प्रियदर्शिनी दुवैले दिनेश फेरि बिहेको तयारी गरिरहेको थाहा पाए । उसले म्याट्रिमोनियल साइटमार्फत नै विवाह गर्न खोजेको पाइयो ।
सोमवार उनीहरू दिनेशले काम गर्ने कम्पनी पुगे । दिनेशलाई भेट्न कार्यालयभित्र जान अनुमति नपाएपछि उनीहरूले दिनेशलाई बाहिर बोलाउनका लागि धर्ना दिए । दिनेश गेटबाट बाहिर निस्कनेबित्तिकै दुवै महिलाले उसलाई रामधुलाइ गरे ।
दुवै महिलाले दिनेशविरुद्ध सुलुर प्रहरी चौकीमा उजुरी दर्ता गराएका छन् । उजुरीका आधारमा प्रहरीले घटनाको अनुसन्धान गरिरहेको छ ।
