नेकपा उपाध्यक्ष एवं राष्ट्रिय सभाका सदस्य वामदेव गौतमविरुद्धको रिटमाथि आजदेखि संवैधानिक इजलासमा सुनुवाइ शुरू भएको छ ।

प्रधानन्यायाधीश चोलेन्द्रशमशेर जबराको नेतृत्वमा गठन भएको ५ सदस्यीय संवैधानिक इजलासमा बुधवार दिनभर सुनुवाइ भएको हो ।

इजलासमा न्यायाधीशहरू दीपककुमार कार्की, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडा रहेका छन् ।

वामदेव विरुद्धका रिट निवेदक वरिष्ठ अधिवक्ता दिनेश त्रिपाठी लगायतले बुधवार बहस गरेका थिए ।

पक्ष र विपक्षका लागि दुई-दुई घण्टाको समय छुट्ट्याइएकोमा रिट निवेदकका तर्फबाट बद्रिबहादुर कार्की लगायतले बहस गरेका थिए । 

विपक्षीका तर्फबाट आज महान्यायाधिवक्ता अग्नि खरेल लगायतले बहस गरेका छन् । बहस नसकिएकाले सुनुवाइ शुक्रवारसम्मका लागि लागि सरेको अधिवक्ता त्रिपाठीले जानकारी दिए ।

गौतमको पक्षबाट डा. युवराज संग्रौला लगायतले बहस गर्ने तयारी गरेका छन् । गौतमको पक्षमा दुई दर्जनभन्दा बढी अधिवक्ताले बहसका लागि नाम लेखाएका छन् । 

यसअघि न्यायाधीश डा. आनन्दमोहन भट्टराईको एकल इजलासले गौतमलाई थप संवैधानिक अधिकार नदिन अन्तरकालीन अन्तरिम आदेश जारी गरेको थियो ।

राष्ट्रपति विद्यादेवी भण्डारीले गौतमलाई असोज १ गते राष्ट्रिय सभाको सदस्यमा नियुक्त गरेकी थिइन् ।

गौतमले सोही दिन राष्ट्रिय सभाको सदस्यको शपथ लिएका थिए ।