वन अतिक्रमण मुद्दामा पक्राउ पूर्जी जारी भएपछि एक हप्तादेखि वडा अध्यक्ष फरार, सेवा प्रभावित

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

कैलालीको कैलारी गाउँपालिका वडा नं. ९ का वडा अध्यक्ष खेमराज चौधरीविरुद्ध पक्राउ पूर्जी जारी गरिएको छ ।


Advertisement

वन अतिक्रमण गरेको भन्दै उनीविरुद्ध डिभिजन वन कार्यालय कैलालीले पक्राउ पूर्जी जारी गरेको हो ।


Advertisement

वडा अध्यक्ष चौधरीले जेसिबी मेसिन प्रयोग गरी करिब ०.४ हेक्टर वन क्षेत्र विनाश तथा अतिक्रमण गरेको डिभिजन वन कार्यालय कैलालीले जनाएको छ ।

वडा नं. ९ वनकनरीस्थित समाज सुधार सामुदायिक वनको पूर्व, पश्चिममा ताल, उत्तरमा स्थानीय मायाराम चौधरीको आवादी जग्गा र दक्षिणमा बाटोबीच पर्ने जग्गा अतिक्रमण गरेको डिभिजन वन कार्यालय कैलालीले जनाएको हो । उनले अतिक्रमण गरी सोही ठाउँमा टहरा समेत निर्माण गरेको बताइएको छ ।


Advertisement

उनी विरुद्ध असोज १९ गते नै पक्राउ पूर्जी जारी गरिए पनि पक्राउ भने अझै गर्न सकिएको छैन । उनी फरार रहेका छन् ।

डिभिजन वन कार्यालय कैलालीका प्रमुख रामचन्द्र कंडेलले वन अतिक्रमण गरेपछि जिल्ला अदालत कैलालीबाट पक्राउ आदेश जारी गरेको बताए । सो घटनाको अनुसन्धानको लागि अनुसन्धान अधिकृत तोकिएर प्रक्रिया अगाडी बढेको बताउँदै उनले मुद्धा अगाडी बढेको बताए ।

तर एक हप्तासम्म पक्राउ गर्न नसकेपछि स्थानीयबासीले वन कर्मचारी र वडा अध्यक्षबीच मिलेमतोको आशंका व्यक्त गरेका छन् ।

यसैबीच अख्तियार दुरुपयोग अनुसन्धान आयोगले पनि सो घटनामा चासो व्यक्त गरेको छ । आयोग कञ्चनपुरका सूचना अधिकारी टोपबहादुर बिष्टले अनुसन्धान प्रक्रिया जारी रहेको बताए ।

पक्राउ पूर्जी जारीपछि वडा अध्यक्ष चौधरी फरार भएपछि वडा कार्यालयको सेवा प्रवाह प्रभावित भएको छ । वडा सदस्य हरिप्रसाद चौधरीले कार्यवाहक पनि नतोकिएकोले सेवाग्राहीहरु रित्तै हात फर्किन बाध्य भएको बताए ।

लखन चाैधरी
लखन चाैधरी

लेखकबाट थप...

कमेन्ट गर्नुहोस्