चीनका राष्ट्रपति सी चिनफिङको स्वास्थ्यका विषयमा अनेकौं अडकल गरिन थालेका छन् । 

बुधवार शेन्जेनमा आयोजित एक कार्यक्रममा सीले बारम्बार खोकेको सुनियो । भाषणको अन्तिम १० मिनेटमा उनको खोकी निकै बढ्यो र सम्बोधन केही समयका लागि रोक्नुपर्‍यो । 

सरकारी टीभी च्यानल सीसीटीभीमा सीको भाषणको प्रत्यक्ष प्रसारण गरिँदैथियो । उनलाई खोकी लागेपछि खोकेको भागको भिजुअल काट्न थालियो । अडियोमा उनी खोकेको आवाज आइरह्यो । 

एउटा दृश्यमा सीले मुखमा हात राखेको देखियो । 

उनले गला खुलाउनका लागि पानीले गार्गल गरेको पनि सुनियो । 

त्यसपछि सीलाई कोरोना लागेको भन्ने हल्ला फैलियो । तर यसको आधिकारिक पुष्टि हुन सकेको छैन । 

खोकीकै कारण सी भ्रमण स्थगित गरेर बेइजिङ गएको भनी हङकङको एप्पल टीभीले दाबी गरेको छ । 

यसबीच चीनमा फेरि कोरोनाका केसहरू देखिन थालेको खबरहरू आइरहेका छन् ।