२९ जेठ २०८३, शुक्रबार
यूएईमा जारी इन्डियन प्रिमियर लिग (आईपीएल) प्रतियोगिताअन्तर्गत १२औं राउन्डको खेलमा किंग्स इलाभेन पञ्जाबले कोलकत्ता नाइट राइडर्सलाई ८ विकेटले पराजित गरेको छ ।
सरजाह स्टेडियममा १ सय ५० रनको लक्ष्य पञ्जाबले ७ बल अगावै २ विकेट गुमाएर पूरा गर्यो । उसको जितमा मन्दीप सिंहले ६६ क्रिस गेलले ५१ र कप्तान केएल राहुलले २८ रनको योगदान गरे ।
२९ बलमा ५ छक्का र २ चौकाको मद्दतले अर्धशतकीय पारी खेलेका गेल म्यान अफ दि म्याच घोषित भए ।
यसअघि टस हारेर पहिले ब्याटिङको निम्तो पाएको कोलकत्ताका शुभमान गिल र कप्तान इयान मोर्गानबाहेक कोही नचल्दा टीम मध्यम स्कोरमा समेटिएको थियो ।
यससँगै पञ्जाब अंक तालिकाको चौथो स्थानमा उक्लिँदा कोलकत्ता भने पाँचौंमा झरेको छ । दुवै टोलीले २ खेल खेल्न बाँकी छ ।
शीर्ष ४ टीम प्लेअफका लागि छानिने भएकाले पञ्जाबका लागि यो जीत निकै महत्त्वपूर्ण छ ।
