२८ जेठ २०८३, बिहीबार
महासचिव विष्णु पौडेलले शुक्रवारका लागि नेकपा सचिवालयको औपचारिक बैठक राखेपछि सचिवालय बैठक बोलाउन माग गर्दै लिखित निवेदन दिएका नेकपाका कार्यकारी अध्यक्ष पुष्पकमल दाहाल ‘प्रचण्ड’ पक्ष शान्त बनेको छ ।
दुवै अध्यक्षसँगको परामर्शमा महासचिव पौडेलले शुक्रवार अपराह्नका लागि बैठक आह्वान गरेका छन् ।
महासचिवले पार्टीको औपचारिक बैठक बोलाइसकेपछि आफूहरूले बैठकको तयारी शुरू गरेको असन्तुष्ट पक्षका एक नेताले लोकान्तरलाई बताए ।
‘अध्यक्षसँगको परामर्शमै बैठक राखिएको हो,’ प्रचण्ड निकट स्रोतले लोकान्तरसँग भन्यो ।
अध्यक्षद्वय प्रचण्ड, वरिष्ठ नेताद्व माधव नेपाल र झलनाथ खनाल तथा उपाध्यक्ष वामदेव गौतम र प्रवक्ता नारायणकाजी श्रेष्ठले सचिवालयको बैठक बोलाउन अर्का अध्यक्ष एवं प्रधानमन्त्री केपी शर्मा ओलीलाई शनिवार लिखित निवेदन दिएका थिए ।
महासचिव पौडेलले पनि पार्टीको विधान अनुसार बैठक बोलाएको लोकान्तरलाई बताए । प्रचण्डसहित सचिवालयका ५ जना नेताहरूबीच शुक्रवार अनौपचारिक बैठक गरी अविलम्ब बैठक बोलाउन आग्रह गरेका थिए ।
४८ घण्टे अल्टिमेटमसहित शनिवार बैठक बोलाउन आग्रह गरेका नेताहरूले निर्धारित समय सकिएपछि मंगलवार फेरि छलफल गरेका थिए । मंगलवार प्रचण्डसँगको भेटमा पनि ओलीले तत्काल बैठक नबोलाउने अडान लिएका थिए । त्यसपछि सचिवालयका ५ जना नेताले बिहीवार सचिवालय बैठक बोलाउन दबाब दिएका थिए ।
सचिवालय बैठक बोलाउन पटक–पटक दबाब आएपछि ओलीले उपयुक्त समयमा बैठक राख्न महासचिव पौडेललाई जिम्मा लगाएका थिए । गत भदौ २६ गते सम्पन्न स्थायी कमिटी बैठकका निर्णय कार्यान्वयन तथा मुलुकमा उठेका जल्दाबल्दा विषय समाधानका लागि भन्दै प्रचण्ड पक्षले बैठक बोलाउन माग गरेको छ ।
औपचारिक बैठक नराखिएमा कार्यकारी अधिकार प्रयोग गरेर आफूले बैठक राख्ने प्रचण्डले बताउँदै आएका थिए । मन्त्रिमण्डल विस्तार, राजदूतहरूको नियुक्ति लगायत विषयमा अध्यक्ष प्रचण्ड असन्तुष्ट छन् ।
