०७ साउन २०८३, बिहीबार
भारतीय सिनेमामा कैयौं कीर्तिमान कायम गर्न सफल बाहुबलीका दुवै भागका स्पेशल इफेक्टहरूको पनि बजारमा खुबै चर्चा छ । ठूलाठूला झरना, पानीमा डुबेकी शिवगामी देवीको हातमा बच्चा तथा तमन्ना र प्रभासले अग्ला पहाडमा गरेको रोमान्सले दर्शकलाई धेरै प्रभावित गरेको थियो ।
माथि उल्लेख गरिएका शटहरू बाहुबली १ मा थिए । बाहुबली २ मा पनि सुन्दर र भव्य भिएफएक्सको प्रयोग भएको छ । यी स्पेशल इफेक्टका लागि ३५ भन्दा बढी देशी तथा विदेशी स्टुडियोबाट सहायता लिइएको थियो ।
बाहुबली २ मा माहिष्मती राज्यको ठूलो झरनामा बनेको हात्तीको पुलको चर्चा जताततै छ । यसलाई कम्प्युटर ग्राफिकको मद्दतले बनाइएको थियो । अनि प्रभास र अनुष्का शेट्टीमाथि छायांकन गरिएको सेतो रंगको हाँसको डुंगाका लागि हाँसको आकारको काठको सेट बनाइएको थियो ।
कटप्पाले बाहुबलीलाई मारेको दृश्यका लागि पनि भिएफएक्सको मद्दत लिइएको थियो ।
बाहुबली २ मा भिएफएक्स सुपरभाइजर आरसी कमलकन्नाका अनुसार कटप्पाले बाहुबलीलाई मार्ने सिनमा कम्प्युटरको सहायताले तरवार आरपार गराउन र दुई अभिनेता कसरी उभिन्छन् त्यसको बारेमा धेरै योजना बुनेर दृश्य तयार पारिएको थियो ।
फिल्ममा मन्त्रीहरू दरबारमा बसेको दृश्य केही सेकेन्डको भएपनि यसलाई तयार पार्न दुई महिना खर्च भएको थियो ।
बाहुबली १ मा पानीमा डुबिरहेकी शिवगामी देवीको हातमा बच्चा बोकेको सिन धेरै चर्चित भएको थियो । दृश्य खिच्ने बेलामा पानीमा बच्चाको ठाउँमा पानीको बोतल प्रयोग गरिएको थियो । भिएफएक्सको सहायताले यो दृश्य तयार पार्न कैयौं दिन लागेको थियो ।
बाहुबली २ मा सैनिकहरू हावामा उड्ने सिन चर्चित भएको थियो । यसलाई ग्रीन म्याट वा क्रोमामा शूट गरिएको थियो । यसका लागि एउटा सानो पर्खाल बनाइयो र कम्पुटर ग्राफिक तयार पार्न पाँच महिना लाग्यो ।
बीबीसी हिन्दीबाट
