३० जेठ २०८३, शनिबार
चीन सरकारको मुखपत्र मानिने ग्लोबल टाइम्सले नेपालमा चीनविरोधी गतिविधि भइरहेको भनी लेखेको छ ।
मंगलवार अबेर राति छापिएको एडिटर्स नोटमा चीन–नेपाल र चीन–भुटान सीमा विवादको विषयमा झूटा खबरहरू आइरहेको र चीनको आलोचना भइरहेको भनी चिन्ता व्यक्त गरिएको छ ।
स्थानीय पर्यवेक्षक तथा ग्लोबल टाइम्सले सम्पर्क गरेका भित्रियाहरूले चीनको बदनामी गर्नका लागि जमीन मिचिएको आरोप लगाउनमा विदेशी हात रहेको बताएका छन् भनी लेखिएको छ ।
त्यसमा थप लेखिएको छ :
स्थानीय पर्यवेक्षक र विज्ञहले यस्तो हल्ला फैलनुमा भारतीय सञ्चारमाध्यमहरू जिम्मेवार रहेको बताएका छन् ।
चीनले नेपाली भूमि मिचेको झूटो आरोप लागेसँगै चीन–भुटान सीमा विवाद पनि फैलियो । गत अक्टोबर महिनामा यो हल्ला फैलाइयो र पश्चिमी तथा भारतीय सञ्चारमाध्यमले यसलाई बढाइचढाइ गरेका छन् ।
मिडिया रिपोर्टहरूमा चीनले नेपालको १५० हेक्टर भूमि गाभेको दाबी गरेका छन् र त्यसलाई चीन र नेपाल दुवै देशका अनुसन्धानहरूले झूटो भनी प्रमाणित गरिसकेका छन् ।
अक्टोबर महिनामा सीमामा ११ दिनको भ्रमण गरेपछि राजनीतिक रूपमा परिचालित एक टोलीले हुम्ला जिल्लामा नेपाल–चीन सीमा मिचेको आरोप लगायो ।
उक्त टोलीको नेतृत्व नेपाली कांग्रेसका नेता जीवनबहादुर शाहीले गरेका थिए । उनलाई स्थानीयहरूले अमेरिकी नीतिको अन्ध समर्थक पनि बताउने गरेका छन् । उनको दल नेपाली कांग्रेसले सीमा मिचिएको भन्ने टोलीको निष्कर्षलाई समर्थन गरेको छ र ऊ नेपालको संसदमा सबभन्दा ठूलो विपक्षी दल हो अनि उसलाई भारतसमर्थक मानिन्छ ।
जीवनबहादुर शाहीले आफ्नो टोलीको प्रतिवेदन सार्वजनिक भएपछि चीनले आक्रामक प्रतिक्रिया दिएकोमा आफूले त्रास अनुभव गरेको आइतवार बताए ।
‘नेपाल–चीन सीमा विषयमा उत्तेजना फैलाउने शाही हुन् । सरकारले चीनबाट मिचिएको छैन भनी धेरैपटक स्पष्ट पारिसकेको छ । नेपाल र चीनको सम्बन्ध सुमधुर नहोस् भनी चाहने केही शक्तिहरू छन् र शाहीले मिडियाको हल्लीखल्लीलाई अपनाएका हुन्,’ नाम खुलाउन नचाहने एक पत्रकारले ग्लोबल टाइम्सलाई बताए ।
जीवनबहादुर शाहीले स्नोल्यान्ड इन्टेग्रेटेड डिभेलोपमेन्ट सेन्टर नामक सामाजिक संस्था चलाइरहेका छन् जसलाई अमेरिकाले आर्थिक सहयोग उपलब्ध गराइरहेको छ ।
शाहीले अमेरिका र भारत सरकारका तर्फबाट चीनविरुद्ध गतिविधि सञ्चालन गर्ने अर्को संगठन पनि चलाउन लागेका छन्, नेपालका एक राजनीतिक पर्यवेक्षकले ग्लोबल टाइम्सलाई मंगलवार बताए ।
