१३ असार २०८३, शनिबार
म्याग्दे गाउँपालिका–२ उमाचोक गाउँ सुन्तला खेतीका लागि जिल्लाकै नमूना बगैंचाको रूपमा स्थापित भएको छ ।
अन्य क्षेत्रका सुन्तला उत्पादनमा भारी ह्रास आए पनि उक्त क्षेत्रमा नगण्य मात्रमा उत्पादनमा कमी आएको जिल्ला कृषि ज्ञान केन्द्रले जनाएको छ ।
उमाचोक सुन्तला ब्लक सञ्चालक समितिलाई चालू आर्थिक वर्षमा २२ लाख ७२ हजार ४९३ रुपैयाँ सहयोग गरिएको केन्द्रका वरिष्ठ कृषि विकास अधिकृत कुलप्रसाद तिवारीले बताए । सुन्तला खेती विस्तार, रोग निवारण, साना सिँचाइ कार्यक्रम, सुन्तला बिरुवा रोपण, बगैंचा सुदृढीकरण लगायत उक्त रकमको व्यवस्था गरिएको हो ।
उनले भने, ‘कृषकको लागत सहभागिता समेत गरी ४० लाख रुपैयाँ रहेको छ ।’
आर्थिक वर्ष २०७६/७७ मा पनि समितिलाई लागत सहभागिताको लागि १३ लाख ७६ हजार ७७१ सहयोग रकम प्रदान गरिएको थियो । यहाँका कृषक सुन्तला बेचेर राम्रै आम्दानी गर्दै आएका छन् । व्यावसायिक कृषकले वार्षिक ५ लाखदेखि ६५ लाख रुपैयाँसम्म आम्दानी गर्ने गरेका छन् ।
उमाचोक गाउँका कृषक सुन्तला बेचेर मनग्गे आम्दानी लिन थालेसँगै सोही पालिकाको छिमेकी वडा १ र ३ का कृषक पनि उमाचोक सुन्तला ब्लक सञ्चालक समितिमा आबद्ध भई व्यावसायिक सुन्तलाखेती तर्फ लागेका छन् ।
यस वर्ष उमाचोक गाउँबाट मात्रै २ करोड २ लाख रुपैयाँ बराबरको सुन्तला बिक्री गरेका छन् । उक्त उत्पादन गत वर्षको तुलनामा २२ रुपैयाँ कमी हो । गत वर्ष उक्त गाउँबाट २ करोड २२ लाखको सुन्तला बिक्री भएको उमाचोक सुन्तला ब्लक सञ्चालक समितिका संयोजक निर्मल अधिकारीले जानकारी दिए ।
गाउँमा सबैभन्दा धेरै सुकनारायण श्रेष्ठले ६० लाख रुपैयाँको सुन्तला बिक्री गरेका छन् । उनले गत वर्ष ६५ लाख रुपैयाँको सुन्तला बिक्री गरेका थिए । अर्का कृषक रामबहादुर थापाले यो वर्ष १६ लाख रुपैयाँको सुन्तला बिक्री गरिसकेको बताए । अहिले वर्ष पानी धेरै परेकोले सुन्तलाका दाना साना लागेको र ढिलो गरी पाकेकोले केही उत्पादन घटेको उनको भनाइ छ ।
