स्टार खेलाडी लियोन्द्रो ट्रोसार्डको उत्कृष्ट दुई गोलको मद्दतले शुरूआती कमजोरी सुधार्दै बेल्जियम फिफा विश्वकपको नकआउट चरणमा प्रवेश गरेको छ । समूह 'जी'को अन्तिम खेलमा न्युजिल्यान्डमाथि ५-१ को फराकिलो जित निकाल्दै बेल्जियम समूह विजेता बनेको हो । अब बेल्जियमले आगामी बुधबार सिएटलमा हुने नकआउट चरणको खेलमा तेस्रो स्थान हासिल गर्ने टोलीको सामना गर्नेछ ।

यसअघि खेलहरूमा बेल्जियमको प्रदर्शन सोचेजस्तो हुन सकेको थिएन । पहिलो खेलमा इजिप्टसँग १-१ को र दोस्रो खेलमा इरानसँग गोलरहित (०-०) बराबरीमा रोकिँदै बेल्जियम अचम्मलाग्दो रूपमा समूहको तेस्रो स्थानमा खुम्चिएको थियो । चार वर्षअघि कतार विश्वकपमा समूह चरणबाटै बाहिरिएको र २०१८ को रसिया विश्वकपमा तेस्रो स्थानमा चित्त बुझाएको बेल्जियमका लागि यो खेल गर या मरको अवस्थामा थियो ।

न्युजिल्यान्डविरुद्धको खेलमा ट्रोसार्डका अलावा केभिन डे ब्रुइने, रोमेलु लुकाकु र अलेक्सिस सान मेकरले पनि १-१ गोल गरे । न्युजिल्यान्डका लागि एलिजा जस्टले एक सान्त्वना गोल फर्काए । विश्वकपमा अगाडि बढ्न न्युजिल्यान्डलाई यो खेल जित्नै पर्ने दबाब थियो, तर हारसँगै 'अल ह्वाइट्स' विश्वकपमा आफ्नो पहिलो ऐतिहासिक जित दर्ता नगरी घर फर्किन बाध्य भएको छ ।

बेल्जियम र न्युजिल्यान्डको खेल भइरहेकै समयमा सिएटलमा समूहकै अर्को निर्णायक खेल इजिप्ट र इरानबीच भइरहेको थियो । उक्त खेल १-१ को रोमाञ्चक बराबरीमा सकियो ।

इरानसँगको यो रोमाञ्चक बराबरीसँगै इजिप्ट आफ्नो फुटबल इतिहासमा पहिलो पटक विश्वकपको अन्तिम ३२ का लागि छनोट हुन सफल भएको छ । खेल सकिएपछि इजिप्टका लेजेन्ड खेलाडी मोहम्मद सलाहले मैदानमा प्रवेश गरी भावुक बनेका इरानी खेलाडी मेहदी तारेमीसँग हात मिलाउँदै खेल भावना प्रदर्शन गरेका थिए । यो बराबरीसँगै समूह 'जी' बाट बेल्जियम र इजिप्ट अर्को चरणमा प्रवेश गर्न सफल भएका छन् ।