२३ जेठ २०८३, शनिबार
बुधबार ७३६ जना संक्रमित थपिए, १३ जनाको मृत्यु
पछिल्लो २४ घण्टाको अवधिमा देशभर सातसय ३६ जनामा कोरोना भाइरसका संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा गरिएको ५ हजार ५५५ जनामा गरिएको पिसिआर परीक्षणमा ७३६ जनामा संक्रमण देखिएको हो ।
देशभरका ८० प्रयोगशालामा पिसिआर परीक्षण हुँदै आएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए ।
यस्तै, गत २४ घण्टाको अवधिमा ८४७ जनाले कोरोना जितेका छन् । हालसम्म कोरोनाबाट मुक्त हुनेको संख्या दुई लाख ३९ हजार चारसय १६ पुगेको छ ।
मन्त्रालयका अनुसार नेपालमा कोरोनाबाट निको हुनेको दर ९५.४ प्रतिशत रहेको छ ।
१३ जनाको मृत्यु
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोना संक्रमणबाट देशभर १३ जनाको मृत्यु भएको छ ।
मन्त्रालयका प्रवक्ता गौतमका अनुसार योसँगै देश भरमा हालसम्म कोरोना संक्रमणबाट मृत्यु हुनेको संख्या एक हजार सातसय ४३ पुगेको छ ।
गत २४ घण्टामा काठमाडौं उपत्यकामा ४३८ जना संक्रमित भएका छन् । तीमध्ये काठमाडौंमा २९४, भक्तपुरमा २० र ललितपुरमा ७७ जना संक्रमित थपिएका छन् ।
हालसम्म नेपालमा १८ लाख ४९ हजारभन्दा बढीको पिसिआर परिक्षण गरिएको मन्त्रालयका प्रवक्ता डा. गौतमले जानकारी दिए । यस्तै, पछिल्लो एक साताको अवधिमा कोरोनाबाट नेपालमा ९२ जनाको मृत्यु भएको छ ।
डा. गौतमले कोरोनाको खोप पत्ता लागेको शुभ संकेतहरु मिले पनि केही समयसम्म अझै नेपालमा स्वास्थ्य मापदण्ड अपनाउनुको विकल्प नभएको बताए ।
