नेकपाका कार्यकारी अध्यक्ष पुष्पकमल दाहाल प्रचण्डले प्रधानमन्त्री केपी ओलीले पार्टीको गत केन्द्रीय समितिको बैठकदेखि नै पार्टी विभाजनका लागि प्रयास गर्दै आएको बताएका छन् । संसद भवन नयाँ बानेश्वरमा सोमबार नेकपाका निवर्तमान सांसदहरुको बैठकलाई सम्बोधन गर्दै प्रचण्डले ओलीले हुँदै नभएको अधिकार प्रयोग गरेर संसद विघटन गरेको बताए ।

‘संसद विघटन गर्दा हुँदै नभएको अधिकारको प्रयोग भएको छ । संविधानले कल्पनै नगरेको, संविधानले रोकेको कुरा प्रयोग भयो । प्रयोग भएको प्रचार गरियो, घोषणा गरियो, प्रधानमन्त्रीले सिफारिस गर्ने र राष्ट्रपतिले त्यसलाई स्वीकृति गर्ने काम गरेर यी दुइटै ठाउँबाट संविधानमाथि निकै ठूलो प्रहर भयो’, प्रचण्डले भने ।

प्रचण्डले ओली र राष्ट्रपति विद्यादेवी भण्डारीको मिलेमतोमा सबै सांसद र जनप्रतिनिधिहरूको अधिकारको अपहरण गर्ने काम भएको समेत बताए । प्रचण्डले बैठकमा भने, ‘यो पार्टी एकता फुटाउनका लागि हाम्रो अर्को अध्यक्ष या प्रधानमन्त्री कमरेड केपी ओलीले गत केन्द्रीय समितिको बैठकपछि पटक पटक प्रयास गर्नुभयो । कहिले अध्यादेश ल्याएर पार्टी फुटाउने, कहिले कथित एमाले नामको अर्को पार्टी दर्ता गर्न लगाएर फुटाउने, कहिले अरु सबैलाई अपमान गरेर फुटाउन खोज्ने गर्नु भएको थियो । हामीले पटकपटक बचाउने गरेका थियौं ।’

उनले आइतबार संसद विघटन हुँदैछ भन्नेबारे आफूले बिहान ५ बजे नै सूचना पाएको उल्लेख गर्दै सो कदम रोक्नका लागि निरन्तर प्रयास गर्दा सफल हुन नसकेको बैठकलाई जानकारी गराए । उनले बालुवाटारमा प्रधानमन्त्री ओलीलाई छलफलका लागि कुर्दै गर्दा एकाएक मन्त्रिपरिषद् बैठकबाट निर्णय नै गराइसकेको जानकारी बैठकमा रहेका एक मन्त्रीको एसएमएसबाट थाहा पाएको पनि बताए ।

‘हिजो बिहान साढे ५ बजे मलाई आज प्रधानमन्त्रीले संसद भंग गर्दै हुनुहुन्छ रे भन्ने जानकारी आयो । अनि मैले वरिष्ठ नेताहरुसँग पनि सम्पर्क गरेर आज विघटन गर्ने तयारी छ भन्ने भरपर्दो सूचना पाएँ, त्यसलाई रोक्न पर्‍यो भनियो’, प्रचण्डले हिजोको घटना ब्रिफिङ गर्दै भने, ‘प्रधानमन्त्रीलाई फोन गरेर साढे ८ बजेतिर यदि तपाईं केही सोच्दै हुनुहुन्छ भने कम्तीमा अन्तिममा तपाईं र म अलि गम्भीर ढङ्गले छलफल नगरेसम्म तपाईं निर्णय नलिनुहोला भनेँ । तर मान्नु भएन ।’
आफू बालुवाटारमा ओलीलाई भेट्न जाँदा उनी हतारहतार बैठकमा गइसकेको पाइएको र पर्खिएर बस्दा विघटन नै गरिसकेको सू्चना पाएको प्रचण्डको ब्रिफिङ थियो ।

‘बस्दा बस्दै मन्त्रिपरिषदबाट एकजना मन्त्रीले मलाई एसएमएस गर्नुभयो कि संसद विघटनको प्रस्ताव आयो भनेर । ढाँट, छल, बेइमानीको यति, यस्तो त मैले कल्पना गर्न सक्दिनँ । यस्तो पनि हुन्छ ?’
प्रचण्डले ओलीको यो कदम विरुद्ध एकजुट भएर अघि बढ्ने बताउँदै ओलीको हर्कतलाई परास्त गरि छाड्ने बताएका थिए ।