१८ असार २०८३, बिहीबार
नेकपा कार्यकारी अध्यक्ष पुष्पकमल दाहाल ‘प्रचण्ड’ले संसद विघटनको असंवैधानिक कदम फिर्ता लिएर आएमा प्रधानमन्त्री एवं नेकपा अध्यक्ष केपी शर्मालाई पार्टीमा स्वागत गर्ने, अन्यथा अनुशासनको कारवाही गर्ने चेतावनी दिएका छन् ।
ओलीको अहंकारका कारण देश संवैधानिक र राजनीतिक दुर्घटनामा फसेको उनले आरोप लगाए ।
काठमाडौंको बबरमहलमा आफूपक्षीय केन्द्रीय कमिटी सदस्यको भेलालाई मंगलवार सम्बोधन गर्दै प्रचण्डले संसद विघटनको असंवैधानिक कदम ओलीले फिर्ता गर्नुपर्ने बताए ।
‘केपी ओली पार्टीमा आउनुहुन्छ, असंवैधानिक कदम फिर्ता लिनुहुन्छ भने पार्टीमा स्वागत गर्छाैं । अन्यथा अनुशासनको कारवाही गर्छाैं,’ प्रचण्डले बैठकमा भने ।
प्रचण्डले ६५ प्रतिशत केन्द्रीय सदस्य आफूहरूसँग भएकाले आफूहरू नै वैधानिक नेकपा भएको समेत दावी गरेका छन् । उनले एकतिहाइ सदस्य उपस्थित बैठकले दुइतिहाइ सदस्य थप गरेर गरिएको निर्णय आधिकारिक हुन नसक्ने बताए ।
निर्वाचन आयोगले वैधानिकता जाँच्ने अवस्थामा आफूहरूलाई आधिकारिक नेकपा मान्नुपर्ने प्रचण्डको भनाइ थियो ।
